Oqý-aǵartý mınıstrligi bilim berý uıymdarynda psıhologıalyq qoldaýdy ınstıtýsıonalızasıalaý boıynsha keshendi jumys júrgizýde.
Atap aıtqanda, 500 oqýshyǵa 1 maman esebinen pedagog-psıhologtarǵa júktemeni azaıtý máselesi qarastyrylýda. Bul týraly Balalardyń quqyqtaryn qorǵaý komıtetiniń tóraǵasy Nasymjan Ospanova aıtty, dep habarlaıdy Almaty-akshamy.kz.
Psıhologıalyq qoldaý qyzmetterin kúsheıtý maqsatynda Mınıstrlik bıyl tamyz aıynda balalardy zorlyq-zombylyqtan qorǵaý, sýısıdtiń aldyn alý jáne olardyń quqyqtary men salamattylyǵyn qamtamasyz etýdiń 2023-2025 jyldarǵa arnalǵan Keshendi jospary, sondaı-aq pedagog-psıhologtar men áleýmettik pedagogtardy daıarlaýǵa qoıylatyn talaptardy qamtıtyn «Pedagog» kásiptik standarty qabyldanǵan bolatyn.
«Mamandardyń neǵurlym tıimdi jumys atqarýy úshin bilim berý uıymdarynda psıhologıalyq qyzmet Erejeleri qabyldandy. Mindetti qujattardyń tizbesi qysqartyldy. 8 óńirde psıhologıalyq qoldaý ortalyqtary qurylyp, «Sıfrlyq kabınet» jumys atqarmaq. Pedagog-psıhologtardyń jumys ýaqyty bekitilip, oqytý kýrstary uıymdastyryldy. Máselen, bıyl 4,5 myńǵa jýyq pedagog-psıholog biliktilikti arttyrý kýrstarynan ótti. Atalǵan sharalar balalar arasyndaǵy keleńsiz qubylystardyń sanyn azaıtyp qana qoımaı, pozıtıvti oılaýdy qalyptastyrýǵa múmkindik bermek», - dep atap ótti Nasymjan Ospanova.
Sonymen qatar, bilim berý baǵdarlamalaryn jańartý jáne bilim berý uıymdarynda mamandar sanyn arttyrý boıynsha jumystar júrgizilýde. Budan bólek, elimizdiń barlyq óńirlerinde psıhologıalyq qyzmet ortalyqtaryn ashý josparlanǵan. Aıta keteıik, búginde elimizde 8 myńnan astam pedagog-psıholog jumys atqarady.