Jańa rezervtik sýmen jabdyqtaý júıesi Medeý aýdanyndaǵy sý tapshylyǵy máselesin sheshti
Almatyda Medeý aýdanyn sýmen jabdyqtaýdyń jańa rezervtik júıesi engizildi
Almatyda ákim Erbolat Dosaevtyń tapsyrmasymen Medeý aýdanynyń ońtústik bóliginde sý tapshylyǵyn joıý úshin qysqa merzim ishinde sýmen jabdyqtaýdyń jańa rezervtik júıesi quryldy, dep habarlaıdy aqshamnews.kz
Jobany júzege asyrý qalanyń joǵarǵy jaǵynda aýa-raıynan zardap shekken jer ústi sý kózderine táýeldiligin joıýǵa múmkindik berdi.
Qurylys bıyl aqpanda bastalyp, shildede bitti. Rezervtik sqemanyń arqasynda búginde Medeý aýdanynyń ońtústik jáne ortalyq bólikteriniń 50 myń turǵyny sýmen turaqty túrde qamtamasyz etilgen.
«Almaty Sý» KMK sýmen jabdyqtaý departamentiniń dırektory Oleg Iýgaı aıtqandaı, jobanyń ereksheligi Talǵar jer asty sýlary ken ornynan kaskadty tásilmen sý berý jáne keri rejımde jumys isteý múmkindigi, ıaǵnı qajet bolsa sýdyń soltústikten ońtústikke jáne keri baǵytta da aǵý baǵytyn ózgertý bolyp tabylady.
«Jumys 8 sýmen jabdyqtaý nysanynda júrgizildi. Ónimdilik 60%-ǵa artyp, 14 birlik sorǵy jabdyǵy ornatyldy. 6 jańa sý jınaý uńǵymasy paıdalanýǵa berildi, kólemi 3 myń m3 taza sý rezervýary qaıta jańartyldy. Sonymen qatar, tirek-rettegish armatýralar aýystyryldy, jańa sý qubyry jelileri salyndy jáne kabel jelileri aýystyryldy», – dedi Oleg Iýgaı.
Medeý aýdanynyń joǵarǵy jaǵynyń turǵyndary sýmen jabdyqtaý berilgen sátten bastap problema joq ekenin atady.
«Aýdanymyzda sýmen jabdyqtaýdyń qanshalyqty jaqsarǵanyn kórip otyrmyz. Buryn sýdyń qysymy men úzilýine baılanysty másele týyndaǵan. Men kópbalaly anamyn, sondyqtan kúndelikti qajettilik úshin taza sýǵa turaqty qol jetkizýdiń qanshalyqty mańyzdy ekenin bilemin. Qabyldanǵan sharalar úshin alǵys aıtamyz, biz qazir jaıly jaǵdaıda ómir súrip jatyrmyz», – dedi Medeý aýdanynyń turǵyny Zarına Maǵaıbekova.
Esterińizge sala keteıik, buǵan deıin Medeý aýdanynda «Balqash» taza sý rezervýary paıdalanýǵa berilgen bolatyn, bul «Kamensk ústirti» shaǵyn aýdanynda aýyz sý tapshylyǵy máselesin sheshýge múmkindik berdi.
Jalpy, byltyr megapolıste 117 km sý qubyry salyndy jáne 46 km jańǵyrtyldy, bul Almaty halqynyń 99,3%-y ortalyq sýmen jabdyqtaýǵa qol jetkizýdi qamtamasyz etýge múmkindik berdi. Alataý, Bostandyq jáne Naýryzbaı aýdandarynyń turǵyndaryn sýmen jabdyqtaý máselesin sheshý úshin 4 sý jınaǵyshtyń qurylysy júrip, jobalanyp jatyr. Osy jylǵa 142 km ınjenerlik komýnıkasıa salý jáne 48 km jelilerdi jóndeý josparlanǵan. Qabyldanǵan sharalar jyl sońyna deıin turǵyndardyń 99,6%-y ortalyq sýmen qamtamasyz etýge jáne jelilerdiń tozý deńgeıin 53,8%-ǵa deıin tómendetýge múmkindik beredi.
Aıta keteıik, jumys júrgizý kezeńinde sýmen jabdyqtaý turaqty júzege asyrylady, qalanyń negizgi kóshelerinde kólik qozǵalysy shektelmeıdi.