Bul týraly Ortalyq saılaý komısıasynyń tóraǵasy Nurlan Ábdirov aıtty.
45 aýdan men oblystyq mańyzy bar qalalardyń ákimderi saılanady, dep habarlaıdy Almaty-akshamy.kz
«Bıyl aýdandar men oblystyq mańyzy bar qalalardyń ákimderin saılaýy alǵash ret pılottyq rejımde ótedi. Zańnamaǵa sáıkes, pılottyq óńirlerdiń tizbesin jáne aýdandar men oblystyq mańyzy bar qalalardyń ákimderin saılaýdy ótkizý kúnin belgileý jónindegi ókilettikter máslıhattarǵa bekitilgen. Sonymen 17 oblystyń máslıhattary pılottyq rejımde saılaý ótkizý úshin 45 aýdan men oblystyq mańyzy bar qalalardyń tizbesin bekitti. Onyń ishinde - 3 qala jáne 42 aýdan. Sondaı-aq saılaý ótkizý kúnin belgilep shyqty. Máslıhattar qabyldaǵan sheshimder negizinde aýdandar men oblystyq mańyzy bar qalalar ákimderin saılaý qarasha aıynyń birinshi jeksenbisinde, ıaǵnı 5 qarashada ótedi», - dedi Nurlan Ábdirov komısıa otyrysynda.
Ábdirovtiń aıtýynsha, «Saılaý týraly» Konstıtýsıalyq zańnyń normalaryna sáıkes, aýdandar men oblystyq mańyzy bar qalalardyń ákimderin saılaýdy tıisti aýmaqtyq saılaý komısıalary máslıhattyń sheshimimen belgilengen saılaýdy ótkizetin kúnge deıin keminde 50 kún buryn, ıaǵnı, 15 qyrkúıekten keshiktirmeı taǵaıyndaýy kerek.
«Saılaýdy jarıalaý, daıyndaý men ótkizýdi uıymdastyrý, sondaı-aq qorytyndylaý boıynsha aıryqsha quziret aýdandar men oblystyq mańyzy bar qalalardyń aýmaqtyq saılaý komısıalaryna tıesili ekenin taǵy da atap ótkim keledi. Ortalyq saılaý komısıasynyń osy naýqan sheńberindegi quzireti ádistemelik jáne normatıvtik qamtamasyz etýde. Mundaı ókilettikterdi bólý «Saılaý týraly» Konstıtýsıalyq zańda kózdelgen jáne 2021 jyldan bastap aýyldar, kentter jáne aýyldyq okýrgter ákimderin saılaý jóninde ótkiziletin naýqandar barysynda is júzinde asyrylyp keledi. Bul tásilde saılaý komısıalarynyń táýelsizdigi týraly saılaý zańnamasynyń konstıtýsıalyq qaǵdıaty, olardyń óz ókilettikterin júzege asyrý kezinde qyzmetine aralaspaý tolyq kólemde júzege asyrylady», - dedi ol.