5 jylǵa sottaldy.
Shymkentte júrgizýshisiz júrip ketip, alty adamdy qaǵyp ketken avtobýs júrgizýshisine qatysty sot úkimi shyqty, - dep habarlaıdy almaty-akshamy.kz "Otyrar" saıtyna silteme jasap.
İstiń mán-jaıyn bes aı boıy Shymkenttiń arnaıy prokýratýrasy zerttedi. Aıyptalýshy - 49 jastaǵy júrgizýshi Haırýlla Iýldashev.
Zardap shekken tarap avtobýs júrgizýshisin qatań jazalaýdy talap etken. Alaıda sońǵy sot otyrysynda marqumdardyń otbasy aıyptalýshyny keshirgen bolatyn. Al prokýror júrgizýshini 8 jylǵa bas bostandyǵynan aıyrýdy suraǵan bolatyn.
"Aıyptalýshynyń kinási dáleldendi. Sot úkimimen ol kináli dep tanylyp, 5 jylǵa bas bostandyǵynan aıyryldy. Sonymen qatar, aıyptalýshy 7 jylǵa kólik júrgizý quqyǵynan aıyryldy", - deıdi sýdıa Janat Músiráli.
Aıta keteıik, Haırýlla Iýldashev abaısyzda bes jaıaý júrginshiniń ólimine ákep soqtyrǵan jol erejesin buzdy dep aıyptalyp otyr. Buǵan deıin ekinshi sot prosesinde kýágerlerden jaýap alyndy. Shamamen 20 kýáger bar.
Sot otyrysynda eń aldymen Shymkent Bus avtoparkiniń basshysy Erǵalı Istambekov jaýap bergen. Onyń sózinshe, 8 sáýir kúni aıyptalýshyda demalys kúni bolǵan jáne №21 avtobýsty Mamyrjan Joldasov tizgindeýi kerek bolǵan.
Alaıda olar basshylyqqa eskertpeı kezekshilik kúnimen aýysqan eken. Bul týraly avtoparktegiler jol apatynan keıin bilgen. Kýáger Haırýlla Iýldashev avtobýsty aıdamas buryn kólikti tekserip alýy kerek edi deıdi. Odan bólek, belgilengen jerde turaqqa qoıyp nemese avtobýsty qol tejegishine qoıy qajet edi. Sonymen qatar, júrgizýshiniń áreketin túsirip turatyn kameradaǵy jazbany alý múmkin bolmaǵan. Júrgizýshilerdiń biri kamerany basqa jaqqa buryp qoıǵany anyqtalǵan.
Eske salaıyq, 8-sáýir kúni Shymkentte bos avtobýs júrip ketip, 6 adamdy qaǵyp ketken edi. Oqıǵa ornynda 3 adam, aýrýhanada 2 adam qaıtys boldy. Olardyń eń úlkeni 43 jastaǵy jalǵyzbasty 5 balanyń anasy. Eń kishkentaıy 14 jastaǵy 9-synyp oqýshysy.
Ajal qushqan eresekterdiń bári otbasylarynyń asyraýshysy bolǵan. Al, qaıǵyly oqıǵadan aman qalǵan jalǵyz adam búgin aýrýhanadan úıine shyqty. 18 jastaǵy boıjetken de 6 baýyry men anasynyń jalǵyz asyraýshysy. Anasynyń aıtýynsha, ázirge jaýaptylardan eshqandaı kómek kelmegen jáne em-domǵa da birshama qarjy kerektigin jetkizdi.