Qazaqstan azamaty, iri kólemde alaıaqtyq jasady degen kúdikpen, Polsha aýmaǵynan ustalyp, elge qaıtaryldy.
Bul týraly Bas prokýratýra málimdedi, dep habarlaıdy aqshamnews.kz.
Tergeý derekterine súıensek, ol 2023 jyly jábirlenýshige Polshadan eki júk kóligin jetkizip beremin dep ýáde bergen. Alaıda 45 mıllıon teńge kólemindegi aqshany alǵan soń, mindettemesin oryndamaı, qarjyny ıemdenip, izin sýytqan.
Kúdikti bıyl aqpanda Polshadaǵy Bodzentyn qalasynda qolǵa tústi. Qazaqstan Bas prokýratýrasynyń suraýymen ol elge ekstradısıalanyp, qazirgi tańda ustaý ızolátoryna qamaldy.
Atalǵan qylmys boıynsha onyń múlkin tárkileý jáne 5 jyldan 10 jylǵa deıin bas bostandyǵynan aıyrý jazasy qarastyrylǵan.