Leonıd Iarýhın bala kezinen nýmızmatıkamen aınalysady, dep habarlaıdy Almaty-akshamy.kz «Habar 24»-ke silteme jasap.
Qazir onyń qolynda 400-ge jýyq moneta bar. Leonıd eń alǵashqy monetany 4 jasynda baqshadan taýyp alǵan. Ol 1738 jyly shyqqan Polsha monetasy bolǵan. Al 11 jasynan bastap nýmızmatıkaǵa shyndap bet bura bastapty.
Bas kezinde eski tıyn-tebenderdi ózi demalýǵa barǵan ózen-kólderdiń jaǵalaýynan izdeıtin. Keıinnen ata-anasynyń keńesimen eski eldi mekenderdiń mańyn qaraýǵa shyǵyp, izdep taba bastaǵan.
- Aldymen kartamen ol jerde ne bolǵanyn qarap alamyz. Sodan keıin ǵana jolǵa shyǵamyz. Osy koleksıanyń arqasynda talaı jerge bardym. Dúnıetanymym tolyqty. Buhar handyǵy, jońǵar shapqynshylyǵy men eski qalalar týraly oqydym. Monetadan bólek áshekeı buıymdar men sadaq jebesiniń ushtaryn da jınap júrmin. Onyń birazy ózim oqıtyn mekteptiń mýzeıinde tur, - deıdi Leonıd Iarýhın.
Leonıdtiń koleksıasyndaǵy monetalardyń eń kónesi VII ǵasyrǵa tıesili. Óziniń aıtýynsha, qazirgi qolda bar 400-ge jýyq monetanyń árqaısysynyń tarıhy bar. Ol eski tıyndy taýyp qana qoımaı, onyń neden jasalǵanyn, qaı zamanda, kimder ustaǵanyna deıin zerttep biledi. Sol dáýirdiń tarıhyn muqıat oqıdy. Onyń jınaǵynda birneshe ǵasyr buryn jasalǵan tıyndardan bólek, Qazaqstannyń Ulttyq banki aınalymǵa shyǵarǵan koleksıalyq jáne ınvestısıalyq monetalar bar.
Qazir Leonıd 8-synypta oqıdy. Júrip-turýy qıyn bolǵandyqtan, muǵalimder ony úıge kelip oqytady. "Qolarbada otyrǵanym bilim alýyma eshqandaı kedergi keltirmeıdi", - deıdi Leonıdtiń ózi. Bıylǵy oqý jylyn óte jaqsy baǵamen aıaqtamaq. Ol bolashaǵyn tarıhpen baılanystyrady. Osy salada bilim alyp, ǵylymmen aınalysqysy keledi.