Búgin Májilistiń VIII shaqyrylymy úshinshi sesıasynyń qorytyndy otyrysy ótti. Parlament Májilisiniń tóraǵasy Erlan Qoshanov atqarylǵan jumystardyń nátıjesin bólisti, - dep habarlaıdy Aqshamnews.kz tilshisi.
"Osy sesıada biz 39 jalpy otyrys ótkizdik, 249 másele qarap, 90 zań qabyldadyq. Sesıanyń ashylýynda Memleket basshysy Qasym-Jomart Kemeluly Toqaevtyń ózi dástúrli túrde depýtattardyń jumysyna serpin bergen bolatyn. Prezıdenttiń Qazaqstan halqyna Joldaýlarynda, Saılaýaldy baǵdarlamasynda, sondaı-aq Ulttyq quryltaı otyrystarynda aıtylǵan bastamalaryn iske asyrý jalǵasyn tapty. Depýtattar eń áýeli azamattardyń áleýmettik jaǵdaıyna erekshe mán beredi.
Birinshiden, biz mindetti áleýmettik medısınalyq saqtandyrý júıesine qatysty tásilderdi qaıta qaradyq. Barlyq azamat úshin, tipti saqtandyrylmaǵan bolsa da, alǵash júgingen kezde tegin bazalyq medısınalyq kómektiń saqtalýy úlken jetistik boldy. Bizdiń usynysymyz boıynsha Tegin medısınalyq kómektiń kepildik berilgen kólemine onkologıalyq skrınıngter engizildi.
Sondaı-aq, qulaǵy nashar estıtin jandardy, ásirese balalardy jergilikti búdjet qarjysy esebinen estý apparatymen qamtamasyz etý múmkindigi qarastyryldy", - dedi Erlan Qoshanov.
Májilis tóraǵasy Balalardyń quqyqtaryn qorǵaýǵa qatysty atqarylǵan isterge toqtaldy.
"Atap aıtqanda, kásibı otbasy ınstıtýty engizildi. Endi kásibı otbasy qıyn jaǵdaıǵa tap bolǵan balany qamqorlyqqa alady, ony balalar úıine tapsyrýǵa jol bermeıdi.
Sonymen qatar, depýtattar jekemenshik oqý oryndarynda oqýshylarǵa ystyq tamaq berýdi uıymdastyrý jónindegi problemany sheshti. Bul kóp jyldan beri sheshimin kútip otyrǵan másele edi. Memleket basshysynyń bastamasymen biz "Keleshek" biryńǵaı erikti jınaqtaý júıesiniń zańnamalyq negizin qaladyq.
Jańa jınaqtaý júıesiniń arqasynda balalardyń sapaly bilim alýyna qosymsha múmkindikter beriledi. Sonymen birge, halyqaralyq ǵylymı jarystarǵa qatysýshylardyń úzdikteri konkýrssyz, sonyń ishinde "Bolashaq" baǵdarlamasy aıasynda bilim granttaryn alatyn norma engizildi", - dedi ol.
Sondaı-aq, qyzmettik mindetin atqarý kezinde qaza bolǵan, ıaǵnı asyraýshysynan aıyrylǵan 530 polısıa qyzmetkeriniń otbasyna aı saıynǵy járdemaqy tóleý máselesi sheshildi.
"Ekinshiden, depýtattardyń qyzmetindegi basty baǵyt "Zań men tártip" qaǵıdatyn zańnamalyq turǵydan odan ári iske asyrý boldy. Depýtattar elimizdiń qylmys jazasy kodeksterin ońtaılandyrý boıynsha úlken jumys atqardy. Azamattardy qylmystyq qastandyqtan qorǵaýǵa baǵyttalǵan zańdar qabyldandy. Jaǵymsyz áleýmettik qubylystarǵa jaýap retinde ınternet-alaıaqtyq jasaǵany úshin "dropperlerge" qatysty qylmystyq jaýapkershilik kúsheıtildi", - dedi ol.
Depýtattar nekege turýǵa májbúrleý isi úshin de jaza engizdi.
Adamnyń bet-álpetin tanyp-bilýge kedergi keltiretin kıim kıýge tyıym salyndy.
Buǵan qosa, Konstıtýsıanyń 30 jyldyǵy qarsańynda depýtattar tarapynan Raqymshylyq jasaý týraly zań ázirlenip, qabyldandy.
Raqymshylyq jasaý arqyly 15 myń azamattyń jaza merzimi qysqartylady.
"Úshinshiden, zań shyǵarýshylardyń basty
mindeti – jańa ekonomıkalyq saıasat úshin berik negiz qalyptastyrý. Osy sesıada depýtattar búdjettik-fıskaldyq rásimder tásilderin tolyǵymen qaıta qarady. Biz qabyldaǵan jańa Búdjet kodeksi arqyly búdjet prosesi edáýir jeńildetilip, eki esege deıin qysqartyldy", - dedi Erlan Qoshanov.
Osy sesıada eń qyzý talqylanǵan qujattyń biri – Salyq kodeksi.
Depýtattyq korpýs aldynda turǵan strategıalyq mindet – memlekettiń, azamattar men kásipkerlerdiń múddeleri arasynda ortaq mámile tabý boldy.
"Tórtinshiden, Progresıvti sý saıasatyn qalyptastyrý baǵytyndaǵy jumys ta belsendi jalǵasty. Qabyldanǵan Sý kodeksi qazaqstandyqtar arasynda
sýǵa, ıaǵnı tirshilik kózine uqyptylyqpen qaraýǵa, únemdeý mádenıetiniń qalyptasýyna bastaý bolary anyq"
Memlekettik organdardyń laýazymdy qyzmetkerleri atyna 461 depýtattyq saýal joldanyp, azamattardy tolǵandyryp júrgen eń ózekti máseleler kóterildi.
Bıyl Túrkitildes memleketterdiń Parlamenttik Assambleıasyna tóraǵalyq etý kezegi Qazaqstanǵa ótti.
Bul – elimizdiń túrki ıntegrasıasy máselelerindegi jetekshi róliniń jáne osy proseste parlamenttik dıplomatıanyń mańyzdylyǵynyń taǵy bir dáleli.
Erlan Qoshanov kelesi sesıada da qabyldanýy kerek birqatar mańyzdy zańǵa toqtaldy.
"Atap aıtqanda, Qurylys kodeksi, sondaı-aq quqyq buzýdyń aldyn alý, tutynýshylardyń quqyqtaryn qorǵaý, bankter jáne bank qyzmeti týraly, basqa da kóptegen mańyzdy zańdar bar", - dedi ol.
Sóz aıaǵynda Májilis tóraǵasy buqaralyq aqparat quraldaryna alǵys aıtty.