Olar Qazaqstan men basqa elder arasynda Bilim jáne ǵylym mınıstrliginiń bastamasymen jasalǵan úkimetaralyq kelisim sheńberinde tegin oqı alady.
Qazaqstandyq jastardyń Majarstan, Polsha, Qytaı, Ýkraına, Slovakıa, Ázirbaıjan jáne Vetnam ýnıversıtetterinde tegin oqý múmkindikteri bar, dep habarlaıdy Almaty-akshamy.kz QR Bilim jáne ǵylym mınıstrliginiń baspasóz qyzmetine silteme jasap.
Ortalyq Azıa elderi arasynda Qazaqstanǵa eń kóp bilim grantyn Majarstan bólip otyr — 250, Qytaı – 47, Polsha – 11, Ýkraına – 10, Slovakıa – 3, Ázirbaıjan – 8, Vetnam – 1. Granttar bakalavrıat, magıstratýra, doktorantýra jáne rezıdentýra baǵdarlamalary boıynsha bólinedi.
«Áńgimelesý barysynda árbir úmitkerge mamandyq tańdaýǵa degen yntasy men jigeri, teorıalyq bilimi men oqýdaǵy nemese tańdaǵan mamandyǵy salasyndaǵy jetistikteriniń deńgeıin anyqtaý úshin suraqtar qoıyldy. Sondaı-aq biz oılaý logıkasynyń deńgeıin, sóıleý sapasyn, kez-kelgen jaǵdaıdaǵy máselelerdi sheshý boıynsha úmitkerlerdiń jeke qasıetteri men daǵdylaryn baǵaladyq. Bilim berý granttaryn taǵaıyndaý týraly túpkilikti sheshimdi qabyldaýshy tarap qabyldaıdy», – dedi QR BǴM Halyqaralyq baǵdarlamalar ortalyǵynyń prezıdenti Aınur Káribozova.
Úmitkerlerdi irikteýdi depýtattar, sarapshylar, ınjenerlik-tehnıkalyq, medısınalyq, gýmanıtarlyq jáne jaratylystaný ǵylymdarynyń doktorlarynan quralǵan táýelsiz komısıa júrgizdi. Táýelsiz saraptama komısıasy negizgi jáne rezervtik tizimge shet tilin bilý deńgeıi, bilimi týraly qujattyń ortasha baly jáne áńgimelesýdiń ortasha baǵasynyń jıyntyǵy boıynsha eń joǵary ortasha bal jınaǵan úmitkerlerdi engizdi.
Úkimetaralyq granttar operatory — QR BǴM Halyqaralyq baǵdarlamalar ortalyǵy.
QR Bilim jáne ǵylym mınıstri men Eýropalyq Odaqtyń Qazaqstandaǵy elshisiniń qatysýymen ótken Qazaqstan-Eýropa forýmynda taraptar bilim berý salasyndaǵy ózara yntymaqtastyq máselelerin talqylaǵanyn aıta ketken jón.