Jaqyn arada aýdan ákimderiniń de tikeleı saılaýyn ótkizý josparlanyp otyr.
Aldaǵy kúnderi Qazaqstandaǵy 27 aýyldyq okrýgte aýyl ákimderiniń saılaýy ótedi. Bul týraly Qazaqstannyń Memlekettik keńesshisi Erlan Qarın aıtty, dep habarlaıdy Almaty-akshamy.kz.
«Osy jeksenbi kúni, 31 shildede, 27 aýyldyq okrýgte aýyl ákimderiniń saılaýy ótedi. Al jyl aıaǵyna deıin 214 aýyldyń basshysy tikeleı saılaý arqyly qyzmetine kirisýi kerek. 2023 jáne 2024 jyldarǵa 1037 aýyldyq okrýgte ákimi saılaýy josparlanǵan. Jaqyn arada aýdan ákimderiniń de tikeleı saılaýyn ótkizý josparlanyp otyr. Onymen qosa, jańa konstıtýsıalyq reforma boıynsha oblys ákimderi óńirlik máslıhat depýtattarynyń daýys berý qorytyndysy boıynsha taǵaıyndalady. Osylaısha, eldiń saıası júıesi birtindep transformasıalanyp keledi. Memlekettik basqarý salasyna demokratıanyń jańa quraldary engzilip jatyr», - dep jazdy Memlekettik keńesshi Telegram kanalynda.
Erlan Karınnyń aıtýynsha, bir jyl buryn Qazaqstanda aýyl ákimderin tikeleı saılaý mehanızmi iske qosylǵan bolatyn. Byltyrǵy shilde aıynan beri 1093 eldi mekenniń ákimi saılandy. Onyń 215-i óz-ózin usynsa, 116-sy qaıta saılanǵan burynǵy ákimder. Bir jyldyń ishinde eldegi aýyl ákimderiniń korpýsy 55,6% jańarǵan.
«Bul 608 aýylǵa jańa basshy keldi degen sóz. Onyń basym bóligi buryn memlekettik qyzmette istep kórmegen. Iaǵnı, dárigerler, muǵalimder, bıznesmender, jergilikti kásiporyn men sharýa qojalyq basshylary halyq senimine ıe bolyp, ákim retinde saılanyp otyr. Bárinen de Mańǵystaý oblysynda jańa ákimder kóp saılandy – 77,8%. (saılanǵan 18 ákimniń 14-i), Odan keıin Qaraǵandy oblysynda – 77,2% (79-dyń 61-i) jáne Jambyl oblysynda – 71% (72-niń 51-i) jańa ákimder kóp saılanǵan», - deıdi Erlan Qarın.
Eske salsaq, Memleket basshysy Qasym-Jomart Toqaev Qazaqstan halqyna Joldaýynda saılaýdy kerek qylmaıtyn adamdardyń qatary kóbeıgenin aıtqan edi.