Bul máseleden Panfılov aýyldyq okrýginiń ákimdigi habardar
Almaty oblysynda 5 qabatty qos úıdiń turǵyndary 30 jyl boıy pesh jaǵyp keledi. Ortalyq jylý júıesinen ajyrap qalǵan 80 otbasy bıyl da qystyń qamyna erte kirispek. Óıtkeni birine kómir túsirip, birine solárka tasyp, al qalǵandaryna gaz balonyn satyp alý kerek, dep habarlaıdy Almaty-akshamy.kz Almaty.tv-ge silteme jasap.
Syrt kózge barlyq jaǵdaıy jasalǵan 5 qabatty úı bolyp kóringenimen, kem-ketikti mundaǵy turǵyndar jaqsy biledi. Al kókke qarap turǵan murjalardan úıdiń otpen jylynatynyn baıqaýǵa bolady.
Murat Bekmuratov el-jurt sekildi balkonyna qajetsiz zattardy jınaı almaıdy. Óıtkeni ornynda qysta jylý beretin úlken pesh pen ot jaǵýǵa qajetti quraldar tur. Kúz kelse 3 balanyń ákesinen maza qashady. Sebebi kómir satyp alýdan bólek, otyn jaǵý úshin shynyǵyp, daıyndalý kerek deıdi. Ol 50 sharshy metrlik páterdi qys boıy jyly ustap turý úshin 3 tonna kómir ketedi dep otyr. Al balalar oınaıtyn aýla kómir túsiretin orynǵa aınalǵan.
«Solárka qymbat. Toqpen úı jylymaıdy, tek kómirmen. Biraq kómirdi 5 qabatqa kóterip shyǵarý kómir qıyndaý. Myna kóp qabatty úıde 40 páter bar, olardyń árqaısysynda bir-bir gaz balonnan tur», – dedi Panfılov aýyldyq okrýginiń turǵyny Murat Bekmuratov.
Jurt qysta qandaı otyn túrin jaǵatynyn bilmeı dal. Mundaǵy halyq qaltaǵa qaraı kósiledi. Turǵyndar bir-biriniń jyldaǵy ketken shyǵynyn eseptep, ishinen tıimdisin tańdaıdy eken. Basym kópshiligi kómir jaqsa, endi biri gaz balonymen jylynady. Al qalǵany solárka qoldanady eken.
«Bári de gaz balonmen otyr. Ár úıde bir balon kem degende. Gazben jaǵatyndar da 5-6 balonnan bar.Eger de olar jarylatyn bolsa, bul úılerden eshteńe qalmaıdy. Qudaı saqtasyn, jarylmasyn. Ondaı jamanshylyq bolmasyn», – dedi Panfılov aýyldyq okrýginiń turǵyny Bolat Elikbaev.
Bul máseleden Panfılov aýyldyq okrýginiń ákimdigi habardar. Mundaı jaǵdaı osyndaǵy kórshi eldimekende de bar. Sonda bas-aıaǵy 26 úı ortalyq jylý júıesine qosylmaǵan. Jaǵdaıdy sheshý úshin 4 jylý qazandyǵyn salý usynylypty. Oǵan shamamen 250 mıllıondaı qarajat kerek. Ázirge smetalyq qujattama da daıyn emes.
Ókinishtisi, turǵyndar bıyl da ortalyq jylý júıesine qosyla almaıdy. Sondyqtan qystyń qamyna erterek kiriskenderi durys.