Almatyda kóshpeli bult shyǵady
Sınoptıkter jańa jyl qarsańynda Qazaqstanda aýa raıy qandaı bolatynyn aıtty. Boljam boıynsha, qar, jańbyr jaýyp, tuman, kóktaıǵaq, jel bolady, dep habarlaıdy Almaty-akshamy.kz.
"Qazgıdromet" RMK málimetinshe, Qazaqstan aýmaǵynyń basym bóligi sıklondyq jeldiń jáne atmosferalyq fronttardyń yqpalynda bolady. Soǵan baılanysty qar jaýady, ońtústikte, batysta jaýyn-shashyn (jańbyr, qar), tuman túsedi.
Almatyda kóshpeli bult shyǵady, aýyq-aýyq qar jaýady. Jeldiń ekpini - 0-5 m/s. Aýa temperatýrasy túnde -2...-4°C, kúndiz 0...+2°C.
"Eldiń soltústiginde, ortalyǵynda, shyǵysynda jaıaý burqasyn bolady. Batysta, ońtústikte, ortalyqta kóktaıǵaq, ońtústikte, ońtústik-shyǵysta, shyǵysta jel kúsheıedi", - delingen habarlamada.
Buǵan deıin sınoptıkter Astana, Almaty jáne Shymkent qalalarynyń úsh kúnge – 2022 jyldyń 30 jeltoqsanynan 2023 jyldyń 1 qańtaryna deıingi aýa raıy boljamyn jarıalaǵan edi.