Olar “Lazada grýpp” kompanıasynyń atynan áreket etken.
Almaty qalalyq polısıa departamenti qalada qarjy pıramıdasyn uıymdastyrǵandardy ustaǵanyn málimdedi, dep habarlaıdy Almaty-akshamy.kz.
Bul Qytaı Halyq Respýblıkasynyń tórt týmasy, olardyń ekeýi qandas mártebesimen Qazaqstan azamattyǵyn alǵan, taǵy ekeýiniń Qazaqstan Respýblıkasynda turýǵa yqtıarhaty bar.
«Kúdiktiler qamaýǵa alyndy. Basty tulǵa – 26 jastaǵy D.esimdi azamatsha ýaqytsha ustaý ızolátoryna qamaldy. Toptyń basqa músheleriniń qylmysqa qatysy men róli tergeý barysynda anyqtalatyn bolady. Qaskóıler kelesideı tizbek boıynsha áreket etti: “Lazada grýpp” kompanıasynyń atynan áreket ete otyryp, olar ınternette kapıtaldy ulǵaıtý múmkindigi týraly habarlandyrý jarıalady jáne azamattarǵa krıptovalútaǵa salym salýdy usyndy. Ańǵal adamdar kóp bolyp shyqty: kúmándi jobaǵa keıbireýleri mıllıondaǵan teńge salǵan. Shyn máninde, “kásipti” uıymdastyrýshylar dıvıdend tóleýdi oılamaǵan da, olar bastapqydan-aq halyqty aldaýdy maqsat etken. Zardap shekkender aýdandyq polısıa basqarmalaryna júgine bastady», – deıdi Almaty qalalyq polısıa departamenti bastyǵynyń orynbasary Dıdar Ahanov.
Kúdiktilerdi qalanyń krımınaldyq polısıasynyń, sondaı-aq Naýryzbaı jáne Almaly aýdandyq polısıa basqarmalarynyń qyzmetkerleri "Aqkent" shaǵynaýdanyndaǵy páterlerdiń birinde ustady. Másele úsh qyz ben bir jas jigit týraly bolyp otyr. Toptyń eń úlken múshesi 26-da, aldyn ala málimet boıynsha, ol jetekshi, eń jasy nebári 20 jasta.
«Jedel tergeý toby kúdiktilerdiń úılerin tekserý barysynda ártúrli adamnyń atyna ashylǵan 60-tan astam bank kartasyn, tórt uıaly telefondy, sim-karta men noýtbýktardy tárkiledi. Mańyzdy detal: jalǵa alynǵan páterden banktik karta shottary men qupıa sózderi bar bes dápter de tabyldy. Qazirgi ýaqytta birqatar qylmystarǵa qatysy bar basqa da adamdardy anyqtaý jáne ustaýǵa baǵyttalǵan keshendi jedel izdestirý is-sharalary júrgizilip jatyr», – dedi Ahanov.