28 qańtarda Prezıdenttiń tóraǵalyǵymen Úkimettiń keńeıtilgen otyrysy ótedi
28 qańtarda Qazaqstan Respýblıkasynyń Prezıdenti Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótedi, dep habarlaıdy Aqshamnews.kz
Otyrys barysynda eldiń áleýmettik-ekonomıkalyq damýy, qarjy turaqtylyǵy, ulttyq ekonomıkanyń mańyzdy baǵyttary, sondaı-aq memlekettik baǵdarlamalardyń oryndalý nátıjeleri talqylanady. Qazirgi ekonomıkalyq ahýalǵa baılanysty azamattardyń ál-aýqatyn arttyrý, ınflásıany baqylaý jáne ınvestısıalyq tartymdylyqty kúsheıtý máseleleri kún tártibine qoıylady.
Otyrysta Premer-Mınıstr Oljas Bektenov, Ulttyq bank tóraǵasy Tımýr Súleımenov, sondaı-aq birqatar óńir ákimderi baıandama jasaıdy dep josparlanýda.
Keńeıtilgen otyrys barysynda memlekettik organdardyń jumys nátıjeleri jan-jaqty taldanyp, naqty baǵa beriledi. Jyl basyndaǵy mundaı formattaǵy jıyndarda mańyzdy sheshimder qabyldanatyny belgili. Osyǵan baılanysty, keıbir mınıstrlikter men óńir ákimdikterinde kadrlyq ózgerister bolýy múmkin degen boljamdar bar.
Memleket basshysy aldyńǵy keńeıtilgen otyrystarda nátıjesiz jumys istegen memlekettik organdar men laýazymdy tulǵalardy synǵa alǵan edi. Bul joly da naqty tapsyrmalar men qatań talaptar qoıylyp, memlekettik organdardyń jaýapkershiligi kúsheıtilýi múmkin.
Qoǵamda keıbir mınıstrlikter men ákimdikterdiń qyzmetine qatysty syndar aıtylyp júrgenin eskersek, Prezıdenttiń osy baǵytta kadrlyq ózgerister engizýi yqtımal. Sonymen qatar, Úkimettiń jumysyn ońtaılandyrý maqsatynda jańa bastamalar men reformalar jarıalanýy múmkin.
Úkimettiń keńeıtilgen otyrysy memlekettik basqarý júıesin jetildirýge, ekonomıkalyq turaqtylyqty qamtamasyz etýge jáne azamattardyń ómir súrý sapasyn arttyrýǵa baǵyttalǵan naqty sheshimder qabyldaýǵa negiz bolady. Aldaǵy otyrys kadrlyq aýys-túıister men jańa reformalardyń bastamasy bolýy yqtımal.