Búgin – Dúnıejúzilik bronh demikpesi kúni
11 jeltoqsanda Dúnıejúzilik demikpemen kúresý kúni atap ótiledi. Bul kúnniń basty mindeti – aýrý jáne ony baqylaý ádisteri týraly habardar bolý, demikpeniń belgileri týraly bilýdi nasıhattaý, emdeýdiń jańa tásilderin aıtý, pasıentterdi dári-dármekter men ıngalátorlardy durys qoldanýǵa úıretý, aýrýdyń aldyn alýdyń mańyzdylyǵyna, trıggerlermen kúresýge jáne aýa sapasyn jaqsartýǵa basa nazar aýdarý.
Bronh demikpesi – tynys alý joldarynyń sozylmaly qabyný aýrýy. Ol ártúrli titirkendirgishterge joǵary sezimtaldyǵymen sıpattalady. Negizgi belgileri: entigý, jótel (kóbinese túngi), keýde qýysynyń qysylý sezimi, syryldar nemese ysqyryqtar.
Demikpeniń sebepteri ártúrli, olar:
- genetıkalyq beıimdilik;
- alergıalyq reaksıalar;
- lastanǵan aýa men toksınderdiń áseri;
- vırýstyq ınfeksıalar;
- stress jáne fızıkalyq belsendilik.
«Demikpe balalyq shaqta da, eresek jasta da bolýy múmkin. Bul ekologıasy nashar nemese alergenderdiń áserine ushyraǵan adamdarda jıi kezdesedi. Demikpeni emdeý tynys alý joldarynyń qabynýyn azaıtýǵa jáne órshýdiń aldyn alýǵa baǵyttalǵan. Negizgi tásilderi: ıngalásıalyq glúkokortıkosteroıdtardy qoldaný; sımptomdardy tez jeńildetý úshin bronholıtıkterdi qoldaný; alergender men trıggerlerden aýlaq bolý; pıkfloýmetrlerdiń kómegimen jaǵdaıdy únemi baqylaýda ustaý. Bul jaǵdaıda salaýatty ómir salty mańyzdy ról atqarady: durys tamaqtaný, fızıkalyq belsendilik kerek jáne temeki shegýden bas tartqan durys», – deıdi Kardıologıa jáne ishki aýrýlar ǴZI respýblıkalyq alergologıa ortalyǵynyń basshysy Araı Batyrbaeva.
Dúnıejúzilik densaýlyq saqtaý uıymynyń málimetteri boıynsha, álemde 262 mıllıonnan astam adam demikpemen ómir súredi jáne jyl saıyn bul aýrýdan 455 myńǵa jýyq adam kóz jumady. Bul statısıka aımaqqa, ekonomıkalyq damý deńgeıine jáne qorshaǵan orta jaǵdaıyna baılanysty ózgerip otyrady.
Dúnıejúzilik demikpemen kúres kúni bul aýrýdy, durys qaraǵan jaǵdaıda baqylaýda ustaýǵa bolatyndyǵy týraly eske salady. Demikpe tolyqqandy ómir súrýge kedergi bolmaýy kerek jáne buǵan memleketterdiń, medısınalyq uıymdardyń jáne pasıentterdiń kúsh-jigerin biriktirý arqyly qol jetkizýge bolady.