Bul týraly QR Aýyl sharýashylyǵy vıse-mınıstri Ábilhaıyr Tamabek málim etti.
Qazir osy baǵyttaǵy jumystar júrip jatyr, dep habarlaıdy Almaty-akshamy.kz
«Aýyl sharýashylyǵynda ónimdilikti arttyrý úshin ár gektar jerdi utymdy paıdalaný qajet. 2019-2021 jyldar aralyǵynda ákimdikter júrgizgen jumystardyń aıasynda 8,1 mln gektar paıdalanylmaıtyn aýyl sharýashylyǵy jeri anyqtaldy. Olardyń 3,4 mln gektaryn jer ıeleri ıgere bastady, al 2,1 mln gektary jer memleket menshigine qaıtaryldy, taǵy 2,6 mln gektar jerdi memleketke qaıtarý boıynsha jumystar júrgizilýde», - dedi Ábilhaıyr Tamabek.
Vıse-mınıstrdiń aıtýynsha, qazir barlyq óńirlerdegi ózekti máselelerdiń biri - halyqty aýyl sharýashylyǵy jerimen qamtamasyz etý. 2022 jylǵy 3 qańtarda paıdalanylmaıtyn aýyl sharýashylyǵy jerlerin májbúrlep alyp qoıý merzimin 2 jyldan 1 jylǵa deıin qysqartý jáne memlekettik baqylaýdyń jańa tetigin engizý jónindegi norma qabyldandy.
«Paıdalanylmaı jatqan jerdiń 90%-y shaǵyn kásipkerlik sýbektilerine tıesili. Bul rette mıkro jáne shaǵyn kásipkerlik sýbektilerine qatysty tekserýlerge moratorıı engizilgeni belgili. Sondyqtan olarǵa tekserýler júrgize almaımyz», – dep túsindirdi Ábilhaıyr Tamabek.
Alaıda spıker 2022 jylǵy 4 mamyrdaǵy №139 buıryqqa sáıkes, «jappaı qaýip» aıasynda jalpy alańy 5,8 mln gektardy quraıtyn 1 901 shaǵyn kásipkerlik sýbektisine qatysty jospardan tys tekserý júrgizilip jatqanyn da eskertti.
«Jer paıdalanýshylardy ekonomıkalyq májbúrleýge jaǵdaı jasaý úshin paıdalanylmaıtyn aýyl sharýashylyǵy jerlerine salyq stavkasy 10 eseden 20 esege ulǵaıtyldy. Osyny eskere otyryp, bıyl 5 mln gektar paıdalanylmaıtyn aýyl sharýashylyǵy jerin memleketke qaıtarýdy josparlap otyrmyz. Bul rette paıdalanylmaıtyn jáne zańnamany buzyp berilgen jerlerdi alyp qoıý bir kúnniń jumysy emestigin atap ótemin. Óıtkeni Konstıtýsıanyń jáne Azamattyq kodekstiń normalaryna sáıkes menshik quqyǵy qorǵalǵan. Al memleketke qaıtarý prosesi tek sot arqyly júzege asady», – dep túıindedi spıker.