Jambyl oblysynyń ákimi Erbol Qarashókeevtiń tóraǵalyǵymen ótken aparattyq keńeste 2025 jyldyń birinshi jartyjyldyǵyndaǵy jumyspen qamtý jáne ataýly áleýmettik kómek kórsetý barysy saralandy.
Jumyspen qamtýdy úılestirý jáne áleýmettik baǵdarlamalar basqarmasynyń basshysy Erkin Kelesovtiń aıtýynsha, bıyl oblysta 65 647 jumys ornyn ashý josparlansa, 1 shildege deıin 25 918 adam eńbekpen qamtylǵan. Jumyspen qamtýdyń belsendi sharalaryna 28 912 adam tartylǵan.
Sýbsıdıalanatyn jumys oryndaryna 22 753 adam joldanyp, onyń 8 330-y turaqty jumysqa ornalasqan. Memleket basshysynyń tapsyrmasyna sáıkes óńirde 2 222 jańa jumys orny ashyldy. Jyl sońyna deıin taǵy 10 myńnan astam jumys ornyn qurý josparlanýda.
Sonymen qatar:
-
98 joba elektrondy eńbek bırjasyna engizilip, 442 adam jumysqa ornalasqan;
-
579 adam qysqa merzimdi kásiptik oqýǵa tartylǵan (jospar – 1 315 adam);
-
501 adamǵa qaıtarymsyz grant berilgen (onyń ishinde kópbalaly analar, múmkindigi shekteýli azamattar, múgedek bala tárbıeleýshiler bar).
AÁK 3 408 otbasyndaǵy 18 705 adamǵa taǵaıyndalǵan. Bul ótken jylmen salystyrǵanda 8 933 adamǵa az. Sondaı-aq 5 848 balaǵa aı saıynǵy tólemder júrgizilgen. Alaıda zerdeleý kezinde 96 otbasyǵa kómek zańsyz berilgeni anyqtalǵan.
Oblys ákimi eńbekke qabiletti azamattardy jumyspen qamtý, jastardy turaqty jumysqa ornalastyrý, kásipkerlikti damytý men áleýmettik kómekti ádil taǵaıyndaýdyń mańyzyn atap ótti. Ol qoǵamdyq jumystar kvotasyn arttyrýdy, qaıtarymsyz granttardyń tıimdi paıdalanylýyn baqylaýdy jáne AÁK taǵaıyndaýǵa jaýapty mamandardy oqytýdy tapsyrdy.