Jetisý oblysynda bilim salasyndaǵy qylmystyq top 4,4 mlrd teńge urlaǵan. Olar bul prosesti 2,5 jyl júzege asyrǵan.
Sybaılas jemqorlyqqa qarsy is-qımyl agenttigi tóraǵasy, sybaılas jemqorlyqqa qarsy qyzmettiń general-maıory Asqat Jumaǵalı bilim salasyndaǵy jemqorlyq týraly aıtty, dep habarlaıdy Almaty-akshamy.kz Azattyq Ruhy-na silteme jasap.
«Tek Jetisý oblysynda qalalyq bilim bóliminiń qyzmetkerleri 2,5 jyl ishinde 4,4 mlrd teńgeni urlaǵan. Qylmystyq topqa basshy jáne eki bilim berý býhgalteri, sondaı-aq 13 mektep býhgalterleri kirdi. Mundaı qylmystyq sqemalar eldiń barlyq aýmaǵynda anyqtaldy. Almaty, Shymkent qalalarynda, Qyzylorda, Aqtóbe jáne Almaty oblystarynda eń iri jymqyrý faktisi tirkeldi. Máselen, jemqorlyq táýekelderine syrtqy taldaý nátıjeleri boıynsha búdjet aqshasyn jymqyrýdyń turaqty tásilderi ashyldy», - dedi Jumaǵalı.
Ol ataǵandaı, qyzmetkerdiń jalaqysyna onyń laýazymyna qaraǵanda áldeqaıda kóp aqsha aýdarǵan.
«Jalaqy mektepte múldem jumys istemeıtin adamdarǵa aýdarylǵan. Qyzmetkerdiń karta-shottaryna jalaqy eseptelip, al tólemderde basqa tulǵanyń tegi kórsetilgen. Bir adamǵa aqsha aýdarymdaryn birneshe ret aýdarǵan. Olar aqshany «óli jandarǵa» - týystary men jaqyndaryna aýdarǵan. Joǵaryda atalǵan barlyq jymqyrý ádisteri bir sqema arqyly júzege asyrylady. Aldymen býhgalter tólem qujattaryn vedimistik esep júıelerinen túsiredi. Ári qaraı, qajetti túzetýler qolmen engizilip, burmalanǵan málimetteri bar qujattar keıin tólemge jiberiledi.Mundaı manıpýlásıalar mekteptiń atalǵan býhgalterlik esep júıeleri, Ulttyq bilim berý bazasy jáne Qazynashylyq-klıent bazasy arasyndaǵy ıntegrasıanyń bolmaýyna baılanysty júzege asqan. Osyndaı faktilerdi boldyrmaý maqsatynda keńes qorytyndysy boıynsha ýákiletti organdar arasynda bilim berý salasyndaǵy sybaılas jemqorlyq táýekelderin joıý jónindegi «Jol kartasyna» qol qoıyldy», - dedi Asqat Jumaǵalı.