«Eńbek resýrstaryn damytý ortalyǵy» AQ Boljaý jáne zertteý departamentiniń sarapshylary demografıalyq boljam daıyndady.
Mamandar týý, ólim jáne kóshi-qon kórsetkishterin negizge alǵan, dep habarlaıdy aqshamnews.kz.
Eńbek resýrstary jáne halyqty áleýmettik qorǵaý mınıstrliginiń málimetinshe, taldaýǵa sáıkes, 2030 jylǵa qaraı Qazaqstannyń qala halqynyń sany 13% - ǵa artyp, 14 mln adamǵa jetedi, al 2050 jylǵa qaraı 57% - ǵa ósip, 19,3 mıllıondy quraıdy. Sonymen birge, 2030 jylǵa qaraı aýyl halqynyń sany tek 1%-ǵa, 7,7 mln adamǵa deıin, al 2050 jylǵa qaraı-shamamen 9%-ǵa, 8,2 mln adamǵa deıin ósedi.
ERDO Boljaý jáne zertteý departamentiniń dırektory Dmıtrıı Shýmekov demografıalyq boljamnyń qalaı qalyptasatynyn egjeı-tegjeıli aıtyp berdi.
«Ol 2401 senarı negizinde jasalǵan, olar eki sanatqa bólinedi – negizgi jáne analıtıkalyq. Negizgige 7 biryńǵaı senarı kiredi – bazalyq, sonymen qatar joǵary jáne tómen, olar óz kezeginde álsiz (2023 jylǵa qatysty 5% ózgeris), ortasha (10% ózgeris) jáne kúshti (15% ózgeris) opsıalar.
Analıtıkalyq kategorıaǵa analıtıkter men modeldeý úshin kóbirek qyzyǵýshylyq týdyratyn barlyq basqa senarıler kiredi», – dep bólisti ol.
Boljam boıynsha, qala halqynyń sany 2030 jylǵa qaraı bazalyq senarı kezinde Astana qalasynda – 538,3 myń adamǵa nemese 39%-ǵa, 1,9 mln adamǵa deıin, Almaty qalasynda – 469,3 myń adamǵa nemese 21% - ǵa, 2 mln 664 myń adamǵa deıin, Shymkent qalasynda –209,6 myń adamǵa nemese 17% - ǵa ósedi, nátıjesinde 1 mln 416 myń adamǵa jetedi. Bul rette úsh megapolıstiń halqy qala halqynyń jalpy sanynyń 43%-yn quraıtyn bolady, al 2050 jylǵa qaraı bul kórsetkish 51%-ǵa deıin ulǵaıady.
Budan basqa, óńirlik bóliniste qala halqy Mańǵystaý oblysynda 79,2 myń adamǵa, Aqtóbe oblysynda 70,3 myń adamǵa, Túrkistanda 62,4 myń adamǵa ósedi. Bul rette Shyǵys Qazaqstan, Soltústik Qazaqstan jáne Pavlodar oblystarynda qala halqynyń sany azaıýy múmkin.
2030 jylǵa qaraı aýyl halqynyń ósýi 2023 jylmen salystyrǵanda tek bes óńirde kútiledi: Almaty oblysynda 140,8 myń adamǵa, Túrkistanda 94,7 myń adamǵa, Mańǵystaýda 58,1 myń adamǵa, Qyzylorda oblysynda 26 myń adamǵa jáne Atyraýda 21,5 myń adamǵa.
2030 jylǵa qaraı aýyl halqynyń edáýir azaıýy Qostanaı oblysynda, Abaı oblysynda jáne Soltústik Qazaqstan oblysynda boljanyp otyr, onda azaıý tıisinshe 37,1 myń, 35,2 myń jáne 33,8 myń adamdy quraıdy.
2050 jylǵa qaraı ERDO taldaýshylarynyń esepteýlerine sáıkes boljamnyń bazalyq nusqasy kezinde Mańǵystaý oblysy megapolısterdi eseptemegende qala halqynyń ósýi boıynsha kóshbasshy bolady. Óńir qalalarynda 736,6 myń adam turady, bul 2023 jylmen salystyrǵanda 384 myńǵa nemese 2,1 ese kóp. Túrkistan oblysynda ósim 355 myń adamdy quraıdy, bul 878,7 myń adamǵa deıin, ıaǵnı 1,7 ese ósýge sáıkes keledi. Aqtóbe oblysynda qala turǵyndarynyń sany 307 myń adamǵa ósip, 1 mln adamdy quraıdy (2023 jylǵa qaraı+44%). Qala turǵyndary sanynyń azaıýy Pavlodar, Shyǵys Qazaqstan jáne Soltústik Qazaqstan oblystarynda boljanady, tıisinshe 7%, 6% jáne 5% - ǵa qysqarady.
Aýyl halqynyń sany Qazaqstannyń ońtústik jáne batys óńirlerinde ósedi. Almaty oblysynda ósim 658 myń bolyp 1 mln 931 myń adamǵa jetedi, bul 2023 jylǵy kórsetkishten 52% - ǵa artyq. Túrkistan oblysynda aýyl halqy 495,2 myńǵa deıin ósip, 2 mln 102 myń adamdy quraıdy. Mańǵystaý oblysynda aýyl halqynyń sany 2050 jyly 709 myń adamdy quraýy múmkin, bul 2023 jylmen salystyrǵanda 284,7 myńǵa kóp.
Aýyl turǵyndary sanynyń eń kóp azaıýy Qostanaı oblysynda kútilýde – 163,6 myń adamǵa qysqaryp 151,7 myń adamdy quraıdy, bul 2023 jylmen salystyrǵanda 52% - ǵa az. Abaı oblysynda 149,6 myń adamǵa azaıyp, halyq sany 87,6 myń adamdy quraıdy. Soltústik Qazaqstan oblysynda aýyl halqynyń sany 2050 jylǵa qaraı 141,6 myń adamǵa qysqaryp, 131,3 myń adam bolady.