«Eńbek resýrstaryn damytý ortalyǵy» AQ (budan ári – ERDO) sarapshylary daıyndaǵan 2050 jylǵa deıingi demografıalyq boljamǵa sáıkes edáýir yqtımal senarıde 2026 jylǵa qaraı Qazaqstanda jumys kúshiniń sany 9,5 mln adam deńgeıinde turaqtanady, 2028 jyldan bastap belsendi óse bastaıdy jáne 2050 jylǵa qaraı 12 mln adamǵa jetedi, dep habarlaıdy almaty-akshamy.kz.
«2027 jylǵa deıin jumys kúshiniń kórsetkishi obektıvti faktorlarǵa baılanysty az nemese múldem óspeıdi dep kútilýde. Bizde jumys kúshiniń azdy-kópti belsendi ósýi shamamen 2028 jyldan bastalady dep kútilýde. 2031 jylǵa qaraı biz 10 mıllıon adamǵa, 2040 jylǵa – 11 mıllıonǵa jaqyndaımyz. Osylaısha, jumys kúshi jylyna shamamen 100 myń adamǵa ósedi. 2050 jylǵa qaraı biz 12 mln adamnan turatyn deńgeıge jetemiz, bul 2023 jylmen salystyrǵanda (9,256 mln) ósim 28%-dy quraıdy», – dedi ERDO Boljaý jáne zertteý departamentiniń dırektory Dmıtrıı Shýmekov.
Óńirler bólinisinde birinshi kezekte megapolısterde, onyń ishinde Astanada jumys kúshi sanynyń ósimi kútilýde, onda 2050 jylǵa qaraı ósim 2,4 ese bolýy múmkin. Almatyda jumys kúshi is júzinde eki esege artady, Mańǵystaý jáne Almaty oblystarynda onyń sany 80 %-ǵa ósedi.
«Bul rette Soltústik Qazaqstan oblysynda jumys kúshiniń 45%-ǵa qysqarý qaýpi bar. Sondaı-aq, tómendeý kútiletin óńirler tiziminde Qostanaı (-29%), Abaı (-25%), Pavlodar (-24%) oblystary bar.
Jetisý boıynsha másele áli de ashyq kúıde qalýda. Qazirgi ýaqytta oblysta jumys kúshi qysqara ma álde óse me belgisiz, ony anyqtaý úshin derekter jetkiliksiz. Ázirge ondaǵy boljamdar qysqarady dep kórsetýde», – dedi sarapshy.
Sondaı-aq, boljam sheńberinde 2050 jylǵa qaraı eńbekke qabiletti jastan kishi jáne odan joǵary jastaǵy halyqtyń jyldam ósýi esebinen eńbekke qabiletti jastaǵy halyqtyń úlesi (59 %-dan 57 %-ǵa deıin) azdap tómendeıtini atap ótildi.
Bul rette eńbekke qabiletti halyqtyń sany 2050 jylǵa qaraı 33%-ǵa ulǵaıyp,15,68 mln-ǵa jetedi. Eńbekke qabiletti jastan kishi halyq 36%-ǵa, 8,18 mln-ǵa deıin, al eńbekke qabiletti jastan asqan halyq 68%-ǵa, 3,7 mln-ǵa deıin ósedi.
Jalpy, 2050 jylǵa qaraı respýblıka halqy shamamen 27,5 mln adamdy quraıdy dep kútilýde, olardyń úshten ekisi megapolıster men ońtústik óńirlerde turatyn bolady.
Kórsetkishter men yqtımal damý senarıleri týraly tolyǵyraq ERDO saıtyndaǵy 2050 jylǵa deıingi demografıalyq boljamnan bilýge bolady.