Almatyda megapolıs ákimi Erbolat Dosaevtyń tapsyrmasymen qalanyń 2030 jylǵa deıingi kólik qańqasynyń sheber-jospary ázirlendi.
Qalalyq máslıhat depýtattary men sarapshylar qaýymdastyǵy aldynda sheber-jospardyń tusaýkeseri barysynda Almaty ákiminiń orynbasary Asqar Ámrın búgingi tańda «adamdar úshin qala» qaǵıdatyn is júzinde iske asyrýǵa múmkindik beretin úılesimdi jol-kólik keshenin salý mańyzdy ekenin atap ótti, dep habarlaıdy almaty-akshamy.kz.
Sheber-jospardyń maqsaty – Almatynyń qalalyq mobıldiligin arttyrý jáne 2030 jylǵa deıin qoǵamdyq kólikterdegi sapar sanyn 64%-ǵa arttyrý. Bul kórsetkishtiń ósýiniń negizgi draıveri halyqtyń jeke kólikten qoǵamdyq kólikke aýysý bolýǵa tıis.
Almatynyń qalalyq mobıldilik salasyndaǵy syn-qaterlerdiń ishinde sarapshylar jeke avtokóliktiń joǵary úlesin, sonymen qatar, qoǵamdyq kóliktiń tartymdylyǵyn qamtamasyz etý úshin kóshe-jol jelisin uzartý jáne túzetý qajettigin atap ótti.
«Júıeli sharalar qabyldaý úshin bıyl mamyrda biz Almaty qalasynyń 2040 jylǵa deıingi bas josparyn bekittik, ol keńistiktik, atap aıtqanda, kólik damýynyń negizin qalady. Bas josparda Almatynyń qalalyq mobıldiligin jaqsartý boıynsha birqatar is-sharalar, onyń ishinde qalanyń kólik qańqasyn ázirleý kózdelgen», - dedi Asqar Ámrın.
Aıta ketý kerek, kólik qańqasyn engizý 2024 jyly bólingen kólik jelisin qurýdan jáne Raıymbek dańǵylyn abattandyrýdan bastalady.
