Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy Almaty-akshamy.kz.
«Ózderińiz biletindeı, jańa Áleýmettik kodeksti Parlament qabyldap, Memleket basshysy qol qoıdy. Ol 1shildeden bastap kúshine enedi. Jańa Kodekste usynylyp otyrǵan sharalar áleýmettik qorǵaý júıesin qaıta retke keltirýge múmkindik beredi. Jalpy, Kodeks halyqaralyq standarttarǵa sáıkestikti qamtamasyz etýge baǵyttalǵan. Osylaısha, áleýmettik qorǵaý jáne zeınetaqymen qamtamasyz etý salasy boıynsha barlyq zańnama bir júıege keltirildi», - dedi Úkimet basshysy.
Onyń atap ótýinshe, Áleýmettik kodekste kúshi joıylǵan 10 zańnyń negizgi normalary saqtaldy.
Sonymen qatar birqatar jańa erejeler qarastyrylǵan. Olardyń barlyǵy halyqtyń ómir súrý sapasyn arttyrýǵa baǵyttalǵan.
«Kodekstiń mańyzdy jańalyǵynyń biri zeınetaqyny kezeń-kezeńmen arttyrý bolyp tabylady. Bıylǵy 1 qańtardan bastap 2027 jylǵa deıin bazalyq zeınetaqy mólsheri orta eseppen 51 paıyzǵa ósetin bolady. Iaǵnı, 2 mıllıonnan astam zeınetker osy qoldaý sharalarymen qamtylady. Jalpy, qabyldanyp jatqan sharalar 2025 jylǵa qaraı jıyntyq zeınetaqyny orta eseppen 27 paıyzǵa arttyrýǵa múmkindik beredi. Sondaı-aq azamattar ózderiniń zeınetaqy aktıviniń 50 paıyzyn senimgerlik basqarýǵa berýge quqyly bolady. Jınaqtyń qalǵan bóligi Biryńǵaı jınaqtaýshy zeınetaqy qorynda qalady. 1 shildeden bastap memlekettik áleýmettik járdemaqy taǵy 14,5 paıyzǵa ulǵaıady. Jalpy ósim - 23 paıyz», - dedi Álıhan Smaıylov.