2026 jyly mektepterdegi barlyq pánge jasandy ıntellekt elementteri qosylady, dep habarlaıdy aqshamnews.kz 24.kz-ke silteme jasap.
Oqý-aǵartý mınıstrliginiń habarlaýynsha, otandyq bilim berý júıesinde sıfrlandyrýdy engizýdiń alǵysharttary qalyptasqan. Bul tusta «muǵalimniń ornyn tehnıka basa ma?» degen oryndy suraq týyndaıdy.
Almıra Orazbaı, tilshi: - Qazirgi sıfrlyq zamanda túrli platformalar damyp jatyr. Ony ári qaraı da órbitý qajet. Máselen Oqý-aǵartý mınıstrligi 2026 jyly bilim baǵdarlamasyna jasandy ıntellektini engizýdi josparlap otyr. Ol arnaıy standartqa saı ár pánniń mazmunyna qaraı ázirlenýde.
Rýslan Qaratabanov, Y.Altynsarın atyndaǵy Ulttyq bilim akademıasynyń vıse-prezıdenti: - Jasandy ıntellektiniń eń basty alǵysharty – ınfraqurylym. Ol kádimgi kompúterlik tehnıkany talap etedi, qoljetimdi ınternetti talap etedi. Sonymen qosa mektepte oqýshylar da, muǵalimder de jumys isteıtin túrli gadjetterdi talap etedi. Qazir mektepterdiń barlyǵy ıá, jabdyqtalǵan, ıá, ol jaqsaryp kele jatyr. Kelesi ol – muǵalimniń óziniń sıfrlyq daǵdylary.
Iá, alǵysharttardyń bastapqysy osy. Oqýshynyń da, muǵalimniń de sıfrlyq daǵdylary bolýy kerek. Sondyqtan Oqý-aǵartý mınıstrligine qarasty Ulttyq bilim akademıasy arnaıy ádistemelik qural daıyndaǵan. Buǵan qosa, ınternettiń de bolýy mańyzdy. Qazir jelini iske qosý jumystary qarqyndy júrip jatyr. Búginde bilim ordalary, jyldamdyǵy sekýndyna 75 megabıt ınternetpen qamtylǵan. Al 1800-den astam mektepte «Starlınk» spýtnıgi jumys istep tur.
Azamat Jumahmet, Y.Altynsarın atyndaǵy Ulttyq bilim akademıasynyń vıse-prezıdenti: - Qazirgi tańda Ulttyq akademıa metodıkalyq quraldar daıyndady, mektepterge taratyldy. Metodıkalyq quraldy daıyndaý aldynda bizder zertteý ótkizgenbiz, «Muǵalim árbir sabaq kezeńine qansha ýaqyt jumsaıdy?». Sol jerde tegin JI-diń quraldaryn qalaı qoldanýǵa bolady, promınjenırıng deıdi, sony qalaı jasap, qalaı kerek aqparatty alýǵa bolatynyn jazǵanbyz.
Jasandy ıntellekt qazirgi tańda tek jeke mektepterde keńinen qoldanylady. Al memlekettik mektepterdiń kóbinde mundaı tájirıbe joq. Máselen myna jeke oqý ordasynda 53 qazaq jáne orys synyby bar. Myńnan astam oqýshy bilim alady. Jańa oqý jylynan bastap mundaǵy pánderge jasandy ıntellekt elementteri engizilgen.
Erjan Áýezov, ınformatıka pániniń muǵalimi: - ChatGPT-ge osyndaı zapros jazýǵa bolady mysaly ınformatıka páni muǵalimi retinde «maǵan osyndaı taqyrypta, osyndaı maqsattarmen, osyndaı eseptermen jospar jazyp bere alasyn ba?» dep jazyp beredi. Sol kesteni júktep alyp, sony qoldanýǵa bolady sabaqta.
Oqýshylardyń aıtýynsha, jasandy ıntellektini qoldanýda eshqandaı kedergi bolmaǵan. «Kerisinshe, onyń tıimdi tusy kóp», - deıdi.
Taıyr Qaldybaev, oqýshy: - Oqýshylar syrqattanyp nemese basqa sebeptermen oqý júıesinen qalyp qoısa, onda bul tusta da jasandy ıntellektiniń tıimdiligi bar. Máselen ChatGPT sekildi platformalarda kez kelgen pánge baılanysty aqparatty alýǵa bolady. Iaǵnı ol muǵalimniń asıstenti retinde júredi. Bizge bilim baǵdarlamasyn jasandy ıntellekt arqyly qabyldaý qıynǵa soqpaıdy.
Aldaǵy ýaqytta aldymen paıdalanýǵa beriletin «jaıly mektepterde» jasandy ıntellektini qoldanýdyń pılottyq jobasy iske qosylady. «Ol sátti júzege assa, onda ózge de oqý ordalaryna engiziledi», - deıdi akademıanyń vıse-prezıdenti.
Azamat Jumahmet, Y.Altynsarın atyndaǵy Ulttyq bilim akademıasynyń vıse-prezıdenti: - Jasandy ıntellekt ol muǵalimniń ornyna kelgen zat emes, ol muǵalimniń kómekshisi. Muǵalim sol JI qoldanyp óz ýaqytyn tıimdi jumsaı alady. Buryn eger muǵalim saǵattap ýaqyt jumsaıtyn bolsa, qazir 5 mınýttyń ishinde ózine kerek plakattar taqyryp boıynsha prezentasıa daıyndap bere alady. Synypta mysaly 25-30 baladan, sondyqtan árbir balaǵa personaldy túrde aqparat berip oqytý úshin óte tıimdi.
Qazir kreatıvti nemese óndiristik saladaǵy kóptegen jobada jasandy ıntellektiniń elementteri bar. Al ony qoldana almaǵan mektep túlegi bolashaqta jumyssyz nemese básekege qabiletti bolmaı qalýy múmkin. Munyń aldyn alý úshin vedomstvo osyndaı jospar quryp, mańyzdy qadamǵa barǵaly otyr.