Oqý-aǵartý mınıstrligi toǵyzynshy synyp túlekteri úshin suranysqa ıe mamandyqtar boıynsha tegin bilim alýǵa jaǵdaı jasaýda.
Bıyl suranysqa ıe tehnıkalyq jáne kásiptik bilim berý boıynsha tegin oqýmen qamtylatyn stýdentter sany 153 myńdy quraıdy, bul kórsetkish ótken jylmen salystyrǵanda 10 myń orynǵa artty, dep habarlaıdy aqshamnews.kz.
Memlekettik tapsyrystyń 70%-y tehnıkalyq mamandyqtarǵa, onyń ishinde mashına jasaý, kólik, energetıka, IT, qurylys jáne basqa da salalarǵa baǵyttalatyn bolady.
«Negizgi basymdyq – básekege qabiletti mamandar daıarlaý, bilim berý mekemelerin zamanaýı materıaldyq-tehnıkalyq bazamen tolyq qamtamasyz etý, pedagogterdiń biliktiligin arttyrý. Qazirgi tańda kásiptik-tehnıkalyq bilim berý júıesin transformasıalaý boıynsha keshendi jumys júrgizilýde, bul memlekettik tapsyrystyń kólemin ulǵaıtýdy, bilim berý baǵdarlamalaryna úzdik halyqaralyq tájirıbelerdi engizýdi, kásibı sheberlik chempıonattaryn ótkizýdi qamtıdy. Sondaı-aq, kásiporyndar úshin dýaldi oqytý júıesin damytý jáne mamandardy daıarlaý maqsatynda bıznes qurylymdary men ınvestorlardy tartý josparlanýda», – dep atap ótti Tehnıkalyq jáne kásiptik bilim departamentiniń dırektory Áset Muhanbetov.
Qazirgi ýaqytta kolejderge 518 kásiporyn sheftik qamqorlyq kórsetedi, olardyń sanyn 4 myńǵa jetkizý josparlanýda. Sonymen qatar jumys berýshilermen birlesip, kásiptik standarttar men memlekettik jalpyǵa mindetti bilim berý standarttary jáne WorldSkills standarttarynyń talaptaryn eskere otyryp, 8 myńǵa jýyq bilim berý baǵdarlamasy ázirlendi. Bıyl kolejder men jumys berýshiler 2 myńnan astam bilim berý baǵdarlamasyn ázirleıdi jáne óndiristik bazada 2 myń pedagog taǵylymdamadan ótedi.