Almaty kóshelerinde 12 myńnan astam jańa sham ornatyldy. «Almaty Qala Jaryq» kásiporny 2025 jyldyń alǵashqy tórt aıynyń ózinde aýqymdy kóshe jaryqtandyrý jumystaryn júrgizdi. Jaıaý júrginshiler men júrgizýshilerdiń jaılylyǵy men qaýipsizdigin qamtamasyz etý maqsatynda trotýarlardy jaryqtandyrý boıynsha aldaǵy josparlar týraly «Almaty Qala Jaryq» SHKK basshysy Igor Mysık baspasóz týry kezinde aıtty.
Onyń aıtýynsha, kásiporyn qalanyń syrtqy jaryqtandyrý júıesin qalpyna keltirý jáne keńeıtý boıynsha aýqymdy baǵdarlamany júzege asyrýda. 2025 jyldyń alǵashqy tórt aıynda Almatyda 12 myńnan astam jaryq núktesi aýystyrylyp, 450 tireý ornatylyp, 110 shaqyrym kabel tartyldy.
Bıyl qala ákimi tapsyrmasymen jaıaý júrginshi aımaqtary, saıabaqtar men trotýarlar boıynda shamamen 5700 jańa torsher tireýlerin ornatý josparlanǵan. Bul turǵyndar men qala qonaqtary túngi ýaqytta da jaıly ári qaýipsiz júrýi úshin jasalǵan.
Ál-Farabı dańǵylynda (Markov kóshesinen Qojanov kóshesine deıin) jaıaý júrginshi aımaǵyna arnalǵan jańa jaryqtandyrý jelisiniń qurylysy bastaldy. Joba aıasynda 147 torsher tireýi ornatylady. Jumystarǵa transheıa qazý, kabel tóseý, tireýler men shamdardy ornatý, elektrge qosý kiredi.
Sonymen qatar, Buqar Jyraý býlvarynda (Baıtursynov kóshesinen Esentaı ózenine deıin) isten shyqqan 43 torsher tireýi aýystyrylyp jatyr. Montaj jumystary táýlik boıy júrgizilýde, jobany mamyr aıynyń sońyna deıin aıaqtaý josparlanǵan. Bul sheshim «Almaty Qala Jaryq» pen Bostandyq aýdany ákimdigine turǵyndardan kóptep túsken ótinishkge baılanysty qabyldandy.
Qalanyń jasyl jelegine zıan keltirmeı, jol boıyn jaryqtandyrý úshin ortalyq kóshelerde 4 metrlik kronshteınder qoldanyp jatyr. Ol shamdardy aǵashtyń butaǵynan tys jerge shyǵaryp ornatady.
Qazirdiń ózinde ornatyldy:
* Abylaı han dańǵylynda – 181 dana;
* Naýryzbaı batyr kóshesinde – 51 dana;
* Abaı dańǵylynda – 232 dana (Dostyq dańǵylynan Bıokombınat kóshesine deıin).
Kórneki mysal retinde – Birinshi Prezıdent saıabaǵyna qarsy ornalasqan Dýlatı kóshesindegi avtoturaqty jaryqtandyrýdy aıtýǵa bolady. Munda 32 tireý ornatylyp, júıe tolyq jumys isteýde. Bul almatylyqtardyń keshki serýenge jıi jınalatyn ornyna aınalǵan.
Jetisý aýdany ákimdiginiń ótinimi boıynsha Úlken Almaty kanaly boıynda uzyndyǵy 1,3 km bolatyn jańa jaryqtandyrý jelisi salynyp jatyr. Bul jerde 34 tireý ornatylady, onyń 21-i Jansúgirov kóshesinen «Gúlder» saıabaǵyna deıingi aralyqta ornatylyp qoıdy. Buǵan deıin bul aýmaqta jaryq múlde bolmaǵan.
Sondaı-aq, jaryǵy nashar jerler de retke keltirilip jatyr. Mysaly, Áýezov jáne Baızaqov kóshelerinde buryn tek joldyń shyǵys jaǵy ǵana jaryqtandyrylǵan, al trotýarlar qarańǵy bolǵan. Endi joldyń batys jaǵyna qosymsha 100-ge jýyq sham ornatylyp, jol bóligi men jaıaý júrginshiler joly tolyq qamtyldy.
Medeý aýdanynda da jaryqtandyrý kúsheıtildi: eski, qýaty az shamdar jaryǵy kúshti jańalaryna aýystyryldy:
* Buzyrbaev kóshesi – 6 dana;
* Báribaev kóshesi – 18 dana;
* Abdýllınder kóshesi – 35 dana;
* Qaıyrbekov kóshesi – 28 dana;
* Lýganskıı kóshesi – 60 dana.
2025 jyldaǵy eń iri jobalar – Almatynyń 7 negizgi kóshesin jaryqtandyrýdy jańartý boldy: ál-Farabı, Tóle bı, Seıfýllın, Abaı, Nazarbaev, Áýezov jáne Naýryzbaı batyr kósheleri. Bul jelilerdiń jalpy uzyndyǵy 60 shaqyrymnan asady. Jańǵyrtý aıasynda shamamen 3000 jaryq núktesi men 1000-nan astam torsher tireýlerin ornatý kózdelgen. Bul Kósheler sonda burynǵydan eki ese jaryq bola túsedi.
Jalpy, 2025 jyly «Almaty Qala Jaryq» 1200 jańa syrtqy jaryqtandyrý jelisin salýdy josparlap otyr. Bul 2024 jylǵy kórsetkishten 10 ese artyq. Mundaı sharalar Almatyda qaýipsiz, jaıly ári zamanaýı qalalyq orta qalyptastyrýǵa baǵyttalǵan.