Almaty onkologtary elimizde alǵash bolyp hımıopreparattardy daıyndaýǵa arnalǵan robottandyrylǵan KiroOncology júıesin engizdi.
Almaty qalasy Qazaqstandaǵy tehnologıalyq medısınanyń flagmanyna aınalýda. Elimizde alǵash ret Almatylyq onkologıalyq ortalyqta hımıoterapıalyq preparattardy daıyndaıtyn KiroOncology robottandyrylǵan júıesi iske qosyldy. Buǵan deıin mundaı tehnologıa Eýropa men AQSH klınıkalarynda ǵana qoldanylǵan edi. Bul týraly Almaty qalasy óńirlik komýnıkasıalar qyzmetiniń alańynda ótken baspasóz máslıhatynda qala ákiminiń orynbasary Nurlan Ábdirahym málimdedi.
Sondaı-aq elimizde alǵash ret Almaty qalasyndaǵy №3 emhanada jasandy ıntellekt negizinde jumys isteıtin daýystyq robottar iske qosyldy. Olar tirkeýshi qyzmetin atqaryp, pasıentterdiń ótinishterin qabyldap, keńes beredi jáne júktemeni avtomatty túrde bóledi. Aldaǵy ýaqytta bul tájirıbe barlyq qalalyq emhanalarǵa engizilmek.
«Almaty medısına salasyn dálirek, qaýipsiz ári qoljetimdi etetin zamanaýı tehnologıalardy engizip keledi», – dedi Nurlan Ábdirahym.
Sonymen qatar, Qalalyq kardıologıalyq ortalyq bazasynda alǵash ret qalalyq deńgeıde júrek transplantasıasy boıynsha ota jasaýǵa daıyndyq júrgizilýde.
Kadrlyq áleýetke de erekshe nazar aýdarylǵan. Qala ákiminiń orynbasarynyń aıtýynsha, jyl saıyn qalanyń medısına mekemelerine 400 jas maman kelip, turǵyn úımen jáne áleýmettik kepildiktermen qamtamasyz etiledi. Sondaı-aq, suranysqa ıe baǵyttar boıynsha 124 dáriger rezıdentýraǵa jiberildi.