Memleket basshysynyń «Adal adam – Adal eńbek – Adal tabys» Ulttyq quryltaı otyrysyndaǵy tapsyrmasyna sáıkes, 2024 jyly 1 700 shaqyrymnan astam gaz qubyry salynyp, 300 myńnan astam azamat kógildir otynǵa qol jetkizdi, dep habarlaıdy aqshamnews.kz
Eldi mekenderdi gazdandyrý halyqtyń ómir sapasyn jaqsartýmen qatar ekologıanyń lastanýyn tómendetýge, balamaly otyn satyp alýǵa jumsalatyn qarajatty únemdeýge jáne óńirlerdiń ınvestısıalyq tartymdylyǵyn arttyrýǵa múmkindik beredi.
2025 jyly eldi gazdandyrý deńgeıin 62%-ǵa jetkizý kózdelgen, bul 12,4 mıllıonnan astam turǵynnyń tabıǵı gazǵa qol jetkizýin qamtamasyz etedi. Bul maqsatta memleket 7 eldi mekendi gazdandyrýǵa arnalǵan 45 jobany iske asyrý úshin 65,9 mıllıard teńge bóldi.
«Fınskaıa-120» avtomattandyrylǵan gaz retteý stansıasy men magıstraldyq gaz qubyrynyń qurylysy Atyraý oblysyndaǵy iri jobalardyń biri sanalady. Joba Atyraý qalasynyń eýropalyq bóligin gazben qamtamasyz etýdi jaqsartyp, óńirdiń ónerkásiptik damýyna serpin beredi.
Tabıǵı gazdy paıdalaný ekologıalyq jaǵdaıdy jaqsartýǵa yqpal etedi. Kómirqyshqyl gazynyń shyǵaryndylary tómen deńgeıde, zıandy qospalar joq, al kómir men mazýtpen salystyrǵanda energıa tıimdiligi joǵary.
Memleket basshysynyń «áleýmettik ámıan» tetigin engizý týraly tapsyrmasy aıasynda Úkimet 2024 jyly Batys Qazaqstan oblysy men Shymkent qalasynda halyqtyń áleýmettik osal toptary úshin taýarlyq gazǵa jeńildikter engizdi. Bul pılottyq joba 6 myńnan astam azamatty qamtydy. Sátti júzege asyrylǵan jaǵdaıda tetik búkil el boıynsha engizilmek.
Sonymen qatar, «Taldyqorǵan – Úsharal» magıstraldyq gaz qubyrynyń qurylysy qarqyndy júrgizilýde. Uzyndyǵy 302 shaqyrym bolatyn bul joba Jetisý oblysyndaǵy 124 myń turǵyndy tabıǵı gazben qamtamasyz etýge múmkindik beredi.
Qashaǵan ken ornynda qýaty jylyna 1 mıllıard tekshe metr bolatyn gaz óńdeý zaýytynyń qurylysy jalǵasýda. Bul ishki tutynýǵa arnalǵan taýarlyq gaz kólemin jylyna 700 mıllıon tekshe metrge ulǵaıtýǵa múmkindik beredi. Sonymen qatar, Qashaǵan shıkizat bazasynda suıytylǵan munaı gazyn óndirý kesheni salynyp jatyr. Joba 2026 jyldan bastap qosymsha suıytylǵan gaz kólemin ishki naryqqa jetkizip, munaı-gaz hımıasyn damytýǵa yqpal etedi.
