2024 jyldyń qarasha aıynda GlobalStats málimetteri boıynsha, Qazaqstandaǵy mobıldi telefon naryǵynda eń tanymal brend Apple boldy. Onyń naryqtaǵy úlesi 38,7%-dy qurady, bul dástúrli túrde Apple kompanıasynyń Qazaqstandaǵy naryqta suranystyń joǵary ekenin kórsetedi, dep habarlaıdy aqshamnews.kz.
Naryqtaǵy úlesi 22,6%,-ben ekinshi orynda Samsung tur. Al úshinshi orynda Xiaomi (16,6%) ornalassa, tórtinshi orynǵa Oppo (5,3%), besinshi orynǵa Vivo (4%) jaıǵasty.
Álemdik saýdada Apple 27,7% naryq úlesimen birinshi orynda, ekinshi orynǵa 23,3%-ben Samsung oryn tepti. Al Xiaomi 11,1% úlespen úshinshi oryndy ıelengen. Vivo men Oppo sáıkesinshe 6% jáne 5,7% naryq úlesterine ıe.
Business Insider sarapshylary 2024 jylǵa arnalǵan eń jaqsy smartfon retinde iPhone 16-ny atap ótti. Bul modeldiń joǵary baǵalaný sebebi – onyń joǵary ónimdiligi, sapaly kamerasy, batareıanyń uzaq jumys isteý merzimi jáne Apple ekojúıesimen úılesimdiligi. Sonymen qatar, iPhone 16 sapa men baǵanyń tamasha úılesimimen erekshelenedi.
2024 jyldyń qyrkúıek aıyndaǵy derekterge súıensek, iPhone 16 eń arzan baǵamen Qytaıda satylǵan – 842 AQSH dollary. Sonymen qatar, eń tómengi baǵa usynylǵan elderdiń qatarynda Japonıa (877 AQSH dollary), AQSH (879 AQSH dollary), Gonkong (885 AQSH dollary) jáne Taıland (889 AQSH dollary) da bar.
Biraq iPhone 16 baǵasy eń joǵary kórsetkishke Túrkıada jetti, onda onyń baǵasy shamamen 1 900 AQSH dollaryn qurady. Sonymen qatar, Brazılıada da iPhone 16 baǵasy joǵary boldy – 1 400 AQSH dollar.
Qazaqstanda 2025 jyldyń 12 qańtaryndaǵy jaǵdaı boıynsha, iPhone 16-nyń baǵasy tanymal dúkenderde ortasha eseppen 609 990 teńgeni qurady, bul shamamen 1 100 AQSH dollaryna teń. Bul baǵa Qazaqstandaǵy iPhone 16 satyp alý úshin qolaıly nusqa bolyp tabylady.
2024 jyly Qazaqstanda jáne álemde mobıldi telefondar naryǵynda Apple kompanıasy jetekshi oryndarda. iPhone 16, óz sapasy men ónimdiligi arqasynda, kóptegen elderde eń jaqsy smartfon retinde tanyldy. Onyń baǵasy ár elde ártúrli bolǵanymen, Qazaqstanda bul modeldi satyp alý áli de tıimdi.