«Aýyldyq densaýlyq saqtaýdy jańǵyrtý» ulttyq jobasynyń sheńberinde 2024 jyly 263 medısınalyq-sanıtarıalyq alǵashqy kómek nysany (MSAK) aıaqtalyp, paıdalanýǵa berildi.
Onyń ishinde óńirlerdiń kartasynda 47 dárigerlik ambýlatorıa, 101 feldsherlik-akýsherlik pýnkt, 115 medısınalyq pýnkt paıda boldy, dep habarlaıdy aqshamnews.kz.
Bıylǵy jyly ulttyq jobany iske asyrý boıynsha kóshbasshylardyń qatarynda: 38 nysan salynǵan Soltústik Qazaqstan oblysy, 37 nysan salynǵan Túrkistan oblysy, 18 nysan salynǵan Jambyl oblysy, 19 nysan salynǵan Qostanaı oblysy, 24 nysan salynǵan Aqmola oblysy bar.
Ulttyq jobanyń sheńberinde aýyldyq eldi mekenderde barlyǵy 655 MSAK nysanyn salý josparlanǵan, oǵan 257 medısınalyq pýnkt, 238 FAP, 160 dárigerlik ambýlatorıa salý kiredi.
Aýyl turǵyndaryna shuǵyl medısınalyq kómek kórsetýdiń ýaqtylyǵyn arttyrý maqsatynda 32 zamanaýı kópbeıindi aýdandyq ortalyq aýrýhanany jańǵyrtý josparlanǵan.
Memleket basshysynyń tapsyrmasy boıynsha iske asyrylatyn aýyldyq aýrýhananyń ınfraqurylymyn jańartý jónindegi ulttyq joba aýyl turǵyndarynyń densaýlyq jaǵdaıyn jaqsartýǵa baǵyttalǵan. Qazirgi zamanǵy jabdyqtarmen jaraqtandyrylǵan jetispeıtin medısınalyq-sanıtarıalyq alǵashqy kómek uıymdaryn salý aýyldaǵy medısınalyq qyzmetterdiń, onyń ishinde profılaktıkalyq qarap-tekserýlerdiń, skrınıngterdiń, júkti áıelder men balalardy patronajdaýdyń qoljetimdiligi men sapasyn arttyrýǵa, dıspanserlik naýqastardy baıqaýǵa, ambýlatorıalyq ońaltýǵa jáne medısınalyq kómektiń basqa da túrlerine múmkindik beredi.