Almaty ákimi Erbolat Dosaev Túrksib aýdanynyń turǵyndarymen kezdesý barysynda olardy sapaly aýyz sýmen qamtamasyz etý jáne káriz jelilerin salý boıynsha qabyldanyp jatqan sharalar týraly baıandady, dep habarlaıdy aqshamnews.kz
2024 jyldyń shilde aıynda «Álmerek» shaǵyn aýdanynda 20 km sý qubyry jáne káriz jelileriniń qurylysy aıaqtaldy. Bıylǵy jyldyń qazan aıynyń sońyna deıin shaǵyn aýdandaǵy 400 úıdi jańa jelilerge qosý josparlanǵan.
Sondaı-aq, bıyl qazan aıynda «Jas Qanat» shaǵyn aýdanynda 8 km sý qubyry jáne 8,6 km káriz jelileri salyndy. Buǵan deıin turǵyndar aýyz sýdy uńǵymalardan alyp kelgen. Qazirgi ýaqytta sońǵy iske qosý-jóndeý jumystary aıaqtalýda, qazan aıynyń sońyna deıin jeliler iske qosylady.
Sonymen qatar, Zakarpatskaıa kóshesinde 4,8 km sý qubyry jáne 1,6 km káriz jelilerin salý jumystary aıaqtaldy. Bıylǵy jyldyń qarasha aıynyń sońyna deıin eki káriz sorǵy stansıasyn (KSS) ornatyp, turǵyndardy jelilerge qosý kózdelgen.
Buǵan qosa, «Tómengi Besjyldyq» shaǵyn aýdanynda 115 km sý qubyry jáne 32 km káriz jelileri salynyp jatyr.
Jumysty bıyl aıaqtaý josparlanyp otyr.
«2024 jyldyń qyrkúıek aıynda «Qaırat» shaǵyn aýdanynda sý jáne káriz jelileriniń ekinshi kezeńin salý boıynsha merdiger anyqtaldy, bul buryn sýmen jáne kárizben qamtylmaǵan ýchaskelerdi tolyq qamtamasyz etýge múmkindik beredi. Bul jumys 2025 jyldyń qyrkúıek aıynda aıaqtaý josparlanýda», - dedi Erbolat Dosaev.
Qala ákimi «Shýaqty» shaǵyn aýdanynda káriz sorǵy stansıasy (KSS) salynyp jatqanyn habarlady, bul Volochaevskaıa kóshesindegi 70 úıdiń káriz máselesin sheshýge múmkindik beredi. Jumys 2024 jyldyń jeltoqsan aıynda aıaqtalady.
Sonymen qatar, «Vokzal» qazandyǵyna 3,4 km sý qubyry jáne 7,3 km elektr jelileri tartý jumystary aıaqtaldy.
Osylaısha, bul jobalar Túrksib aýdanynyń 21 myńnan astam turǵynyn sapaly aýyz sýmen qamtamasyz etýge múmkindik beredi, dep sózin túıindedi Almaty ákimi.
Aıta keteıik, Erbolat Dosaevtyń tapsyrmasy boıynsha 2024 jyldyń 9 aıynda Almaty qalasynyń sý jáne káriz júıeleri salasynda 219 km jańa jeli salyndy jáne 27,3 km eski jeli jańǵyrtyldy.
Qabyldanyp jatqan sharalar 2025 jyly sý qubyry jelileriniń tozýyn 53,5%-ǵa, káriz jelileriniń tozýyn 55,2%-ǵa deıin tómendetýge múmkindik beredi.