Almaty qalasynyń turǵyndary ekstrakorporaldy uryqtandyrý (EKU) baǵdarlamasyn belsendi túrde paıdalanyp keledi.
Bul prosedýra tolyqtaı mindetti áleýmettik medısınalyq saqtandyrý (MÁMS) júıesi arqyly qarjylandyrylady. 2024 jyly ǵana «Ańsaǵan sábı» baǵdarlamasy aıasynda jalpy quny 3,9 mlrd teńgege 3229 prosedýra júrgizildi, dep habarlaıdy aqshamnews.kz.
Bul týraly óńirlik komýnıkasıalar qyzmetinde ótken baspasóz konferensıasynda medısınalyq saqtandyrý qorynyń Almaty qalalyq fılıalynyń dırektory İlıas Muhamedjan málimdedi.
Spıker sóz barysynda EKU prosedýrasyn tıimdi paıdalanǵan azamatsha týraly mysal keltirdi. 37 jastaǵy kásipker áıel bir jyl ishinde 71 400 teńge kóleminde saqtandyrý jarnasyn tólegen. Al oǵan jasalǵan EKU prosedýrasynyń quny — 1,2 mln teńge bolǵan, bul — onyń tólegen jarnasynan 17 ese joǵary. Sonymen qatar, oǵan dıagnostıkalyq qyzmetter de tegin kórsetilgen.
Budan bólek, qor basshysy almatylyqtardyń konsýltatıvtik-dıagnostıkalyq qyzmetterdi belsendi paıdalanyp júrgenin atap ótti. 2024 jyly 102 myńnan astam KT jáne MRT zertteýleri júrgizilip, olardyń jalpy quny 1,6 mlrd teńgeni qurady. Buryn bul qyzmet túrleri tek áleýmettik osal sanattaǵy azamattarǵa ǵana qoljetimdi bolsa, qazir barlyq saqtandyrylǵan azamattar paıdalana alady.
«MÁMS júıesiniń artyqshylyǵy — tabys deńgeıine qaramastan tolyqqandy medısınalyq kómek pen dıagnostıka alýǵa múmkindik berýinde», — dep túıindedi spıker.