2024 jyly Almaty búdjetiniń kirisi 1874 mlrd teńgege deıin ósti
2024 jyly Almaty qarqyndy áleýmettik-ekonomıkalyq damýdy kórsetti. Qalanyń qysqa merzimdi ekonomıkalyq ındıkatory 5,5% boljamdy ósimnen asyp, 8,3%-ǵa jetti. Kólik qyzmetteriniń kólemi 25,3%-ǵa, qurylys kólemi 17%-ǵa jáne saýda kólemi 8,6%-ǵa ósýdiń draıverleri boldy, dep habarlaıdy aqshamnews.kz
2024 jyldyń 9 aıynda Almaty qalasynyń jalpy óńirlik ónimi naqty kórsetkishte 3,8%-ǵa ósti. 2024 jyldyń qorytyndysy boıynsha qalanyń JÓÓ ósimi 5,8%-6% deńgeıinde baǵalansa, 2025 jyly ekonomıkalyq ósimniń 6,4%-ǵa deıin jedeldeýi boljanyp otyr.
Qala ekonomıkasynyń qarqyndy ósýiniń arqasynda jergilikti búdjettiń kirisi artyp keledi. 2024 jyly Almaty búdjetine 1 874 mlrd teńge salyq jáne tólemder tústi, bul 24% ósim kórsetip otyr. Negizgi kirister – shamamen 70%-y - SHOB damýy esebinen qamtamasyz etilgen.
2024 jyldyń 9 aıynda almatylyqtardyń ortasha tabysy 335 myń teńge bolyp, naqty kórsetkishte 10,2%-ǵa ósti. Ortasha aılyq jalaqy naqty túrde 6,1%-ǵa ósip, 470 myń teńgege jetti, bul ótken jyldyń osy kezeńimen salystyrǵanda joǵary.
2024 jyly 73,9 myń jumys orny quryldy, onyń 83,2%-y – turaqty jumys oryndary (61,5 myń). Sonyń nátıjesinde 2024 jyldyń III toqsanynda jumyssyzdyq deńgeıi 4,6%-ǵa deıin tómendedi.
Joǵary iskerlik jáne ınvestısıalyq belsendilik saqtalýda. 2024 jyly negizgi kapıtalǵa ınvestısıa óńdeý ónerkásibine (2,9 ese), bilimge (84,7%), kólik (37,5%), densaýlyq saqtaý (31,3%) salalaryna salynǵan ınvestısıanyń aıtarlyqtaı ósýi esebinen 8,2%-ǵa ulǵaıdy. 90%-y jeke ınvestısıa bolsa, olardyń ósimi 6,2% boldy.
Qalanyń qolaıly ınvestısıalyq klımaty joǵary nesıe reıtıńpen rastalady. 2024 jylǵy 6 jeltoqsanda Fitch Ratings agenttigi Almaty qalasynyń «VVV+» deńgeıindegi derbes nesıe reıtıńin, «Turaqty» boljamyn rastady.
Shaǵyn jáne orta bıznes qarqyndy damýda, bul salada turaqty jumys oryndarynyń 80%-dan astamy quryldy. 2024 jyly sýbsıdıalaýǵa, kepildik berýge jáne nesıe berýge búdjetten 53,1 mlrd teńge bólinip, SHOB-tyń 2507 jańa jobasy qoldaý tapty.
Óńdeý ónerkásibin damytý qala ekonomıkasyn ártaraptandyrýdyń negizgi basymdyqtarynyń biri. «Almaty» ındýstrıalyq aımaǵynda 485 mlrd teńgege 67 joba iske asyrylyp, 11,6 myń jumys orny quryldy. 2025 jyly 197 mlrd teńgege 15 jobany paıdalanýǵa berý josparlanýda, bul 2700 jumys ornyn ashýǵa múmkindik beredi. «ATP» AEA-da 31 mlrd teńgege 13 joba júzege asyrylyp, 220 jumys orny ashyldy. Bıyl 10 mlrd teńgege 5 jobany iske qosý kózdelgen, bul 361 jumys ornyn ashýǵa septigin tıgizedi.
2040 jylǵa deıingi bekitilgen Bas josparǵa sáıkes, qurylys tyǵyzdyǵynyń tómendetý jáne jasyl aımaqtardy ulǵaıtý kózdelip otyr. Osyǵan baılanysty 2024 jyly paıdalanýǵa berilgen turǵyn úı kóleminiń 10,3%-ǵa tómendedi. 2023 jyly 2,67 mln sharshy metr bolsa, 2024 jyly 2,4 mln sharshy metr turǵyn úı paıdalanýǵa berildi.
Jalpy, 2024 jylǵa belgilengen ekonomıkalyq ósim men búdjet kirisiniń barlyq parametri oryndaldy. Bıyl da áleýmettik-ekonomıkalyq kórsetkishterdiń qarqyndy damýy jalǵasady.