Elimizde 373 myń oqýshy ornyna arnalǵan 257 mekteptiń qurylysy aıaqtaldy.
Bul úsh aýysymdy 42 mekteptiń jáne 148 eldi mekende ornalasqan 20 apatty mektep pen oryn tapshylyǵy máselesin sheshýge múmkindik berdi. Bul týraly aqshamnews.kz QR oqý-aǵartý mınıstrliginiń baspasóz qyzmetine silteme jasaı otyryp habarlaıdy.
Úsh aýysymdy oqytý jáne apatty mektepter máselesin sheshý boıynsha búdjet qarajaty esebinen jáne ınvestısıa tarta otyryp júıeli jumystar júrgizilýde.
Memleket basshysy bastamashylyq etken «Jaıly mektep» ulttyq jobasy aıasynda oqý jylynyń basynan 254 myń oqýshy ornyna arnalǵan 105 mektep paıdalanýǵa berildi, onyń ishinde 40%-dan astamy aýyldyq jerlerde ornalasqan.
Bilim berý ınfraqurylymyn qoldaý qory boıynsha 27 myń oqýshy ornyna arnalǵan 25 mektep qoldanysqa berildi. Qosymsha taǵy bes mektep pen 3,3 myń oryndyq ınternat qurylysy júrýde. Bilim berý nysandary qurylysynyń basym bóligi Jetisý, Qyzylorda, Batys Qazaqstan, Aqmola oblystarynda jáne Almaty qalasynda salynýda. Bul jobalardy iske asyrý mektepter men ınternattardaǵy oqýshy oryndarynyń tapshylyǵyn qysqartýǵa, sondaı-aq bir mektepte apatty ǵımarat máselesin sheshýge múmkindik beredi. Barlyǵy jemqorlardan tárkilengen qarajat esebinen jalpy sany 100 myń oqýshy oryndyq 89 mekteptiń qurylysy qarjylandyryldy.
Sondaı-aq respýblıkalyq jáne jergilikti búdjet qarajaty men jeke ınvestısıalar tartý esebinen 92 myń oqýshy ornyna arnalǵan 127 mektep qurylysy júrgizildi.
Jańa nysandardy iske qosýmen qatar qoldanystaǵy ınfraqurylymdy jaqsartý boıynsha da aýqymdy jumystar júrgizildi:
• 254 orta oqý orny kúrdeli jóndeýden ótti;
• 967 mektepke arnalǵan 1621 zamanaýı pándik kabınet satyp alyndy;
• zamanaýı standarttarǵa sáıkes 1 myń aýyl mektebi jańǵyrtyldy;
• 10 myńnan astam bilim berý uıymynyń qaýipsizdik júıelerimen tehnıkalyq jaraqtandyrylýy jaqsartyldy.
Aıta keteıik, memleket jyl saıyn mektepterdi salýǵa jáne jańǵyrtýǵa qarajat bólip keledi. Jańa nysandar qurylysy úsh aýysymdy 42 mekteptiń, 148 eldi mekende ornalasqan 20 apatty mektep pen oqýshy orynynyń tapshylyǵy máselesin sheshýge múmkindik berdi.