Bul týraly Densaýlyq saqtaý mınıstri Ajar Ǵınıat búgin ótken Úkimet otyrysynda málimdedi, dep habarlaıdy Almaty-akshamy.kz BAQ.KZ-ke silteme jasap.
Qaýip faktorlarynyń profılaktıkasy jáne basqarý baǵyty boıynsha onkologıalyq skrınıngtik baǵdarlamalardy keńeıtý júrgiziledi. Ólim-jitimniń negizgi sebebi bolyp tabylatyn ókpe obyryn anyqtaý úshin tómen dozaly kompúterlik tomografıany engizý josparlandy. Áıelderdiń arasynda keń taralǵan jatyr moıny obyrynyń profılaktıkasy úshin 2024 jyldan bastap adam papıllomasy vırýsyna qarsy vaksınasıalaý kezeń-kezeńimen engiziletin bolady. Vaksınasıalaýdy engizgenge deıin halyqtyń nysanaly toptarynyń arasynda túsindirý jumystary belsendi júrgiziletin bolady, - dep atap ótti vedomstvo basshysy.
Sonymen qatar mınıstr onkologıany azaıtý úshin halyqpen jumys jáne onkologıalyq saqtyq boıynsha medısına qyzmetkerlerin oqytý, halyqtyń salamatty ómir saltyn ustanýyn arttyrý boıynsha is-sharalar keshenin júrgizý jalǵasady dep otyr.
Medısınalyq-sanıtarıalyq alǵashqy kómek uıymdary men onkologıa ortalyqtaryn jabdyqtaý úshin mamograftar, KT, MRT, ÝDZ apparattary, angıograftar, beıneendoskopıalyq jabdyqtar sekildi dıagnostıkalyq jabdyqtardy jańartý kózdelgen. Molekýlalyq-genetıkalyq testter men ımmýnogıstohımıalyq zertteýlerdi arttyrý arqyly obyrdyń ártúrli túrlerin dıagnostıkalaý múmkindikteri ulǵaıtylatyn bolady, - dedi Ajar Ǵınıat.
Buǵan deıin Ajar Ǵınıat bes baǵytty qamtıtyn keshendi jospardyń jobasyn usynǵan bolatyn. Ony iske asyrý úshin medısınalyq jabdyqtardy, dárilik preparatttardy satyp alýǵa, mamandardy oqytýǵa, zamanaýı onkologıa ortalyqtaryn salýǵa, rekonstrýksıalaýǵa jáne kúrdeli jóndeý júrgizýge shamamen 474 mlrd teńge qajet bolady.