Memleket basshysy Qasym-Jomart Toqaev «2023 – 2025 jyldarǵa arnalǵan respýblıkalyq búdjet týraly» zańǵa qol qoıdy. Atalǵan zań jobasy aıasynda 2023 jyldyń 1 qańtarynan bastap zeınetaqy tólemderiniń mólsherine ózgeris engiziledi, - dep habarlaıdy almaty-akshamy.kz QazAqparat sarapshysyna silteme jasap..
«2023-2025 jyldarǵa arnalǵan respýblıkalyq búdjet týraly» QR Zańyna sáıkes, 2023 jyldyń 1 qańtarynan bastap yntymaqty jáne bazalyq bólikterden turatyn zeınetaqynyń eń tómengi mólsheri 77 417 teńgeni quraıdy. Bul rette yntymaqty bóligi 53 076 teńge bolyp belgilenip, bazalyq zeınetaqynyń eń tómengi mólsheri 24 341 teńgege ózgeredi.
Sondaı-aq zeınetaqy tólemderine baǵyttalǵan qarajat jasyna baılanysty jáne eńbek etken jyldary úshin zeınetaqy tólemderin 10,5 paıyzǵa arttyrý qarastyrylǵan.
Biryńǵaı jınaqtaýshy zeınetaqy qory zeınetaqy qarajatyn merziminen buryn paıdalanýdyń 2023 jylǵa eń tómen jetkiliktilik shegin belgiledi. Qor málimetinshe, 2023 jylǵa belgilengen eń tómen jetkiliktilik shegi jas mólsherine baılanysty 3-ten 10 mıllıon teńgege deıingi soma bolady. Bekitilgen ádistemege sáıkes, eń tómengi jetkilikti shek shamalary ár jas mólsheri úshin jeke anyqtalady jáne bolashaq zeınetaqy tólemderi men zeınetaqy jarnalarynyń ósýin (ındekstelýin) eskeredi.
Naqtyraq aıtqanda, eń tómengi jetkiliktilik shegi - bul salymshynyń zeınetke shyqqannan keıin eń tómengi bazalyq zeınetaqymen qosa eń tómengi zeınetaqydan kem emes jıyntyq tólemder alýy úshin shotynda qalýǵa tıisti eń tómengi soma.
Osylaısha, 2023 jyly 20 jastaǵy salymshy zeınetaqy shotyndaǵy 3 mln 260 myńnan, 30 jastaǵy salymshy 4 mln 580 myńnan, 40 jastaǵy salymshy 6 mln 100 myńnan, 50 jastaǵy salymshy 7 mln 860 myńnan, 60-62 jastaǵy salymshylar 9 mln 890 myńnan asqan somany merziminen buryn paıdalana alady.
Aıta keteıik, Prezıdent Qasym-Jomart Toqaev Qazaqstan halqyna Joldaýynda áıelderdiń zeınetke shyǵý jasy 2029 jylǵa deıin 61 jas deńgeıinde qalatynyn málimdegen edi. Buǵan deıin Qazaqstanda áıelderdiń zeınetke shyǵý jasyn 63 jasqa deıin kezeń-kezeńimen arttyrý josparlanǵan bolatyn.