Bıyl Qaznet paıdalanýshylary jalǵan habarlamalardy kóp taratyp, bólisýdi jalǵastyrdy.
Konspırologtar áli de bolsa, barlyq qıyndyqtarǵa álemdik úkimetti kinálaıdy. Biraq bul qaýymdastyqqa kimniń kiretini belgisiz bolǵandyqtan feıkterde naqty keıipkerlerdiń esimi jıi atalady. Stopfake.kz saıty 2023 jyly feık jańalyqtarda eń kóp atalǵandardy atap ótken, dep habarlaıdy Almaty-akshamy.kz.
Bıll Geıts
Feıkterdiń kóbinde amerıkalyq kásipker Bıll Geıts týraly aıtylady. Qastandyq teorıasyn jaqtaýshylardyń pikirinshe, ólimge ákeletin qaýipti vaksınalardy naq osy Microsoft kompanıasy shyǵarady. Onyń Úndistan, Afrıka jáne Ońtústik Sýdan elderinde balalardyń ólimine ákelgen turǵyndardy ımmýndaýǵa qatysy bar eken. Sondaı-aq, fılantrop adamdardy baqylaý jasaý úshin halyqty chıpteıdi, búkil mal sharýashylyǵyn joıýǵa jáne shaqqannan keıin adamda etke alergıa týdyratyn genetıkalyq túrlendirilgen kene jasaýǵa qarajat salady deıdi.
Geıtstiń ózi munyń bári ótirik jáne mundaı málimdemeler adamdar arasynda arazdyq týdyrady dep birneshe ret aıtty. Onyń sózinshe, adamzat vaksınasıany alaıaqtyq dep sanasa, adamdar aýrýdan qaıtys bolady. Konspırologtar keltirgen barlyq faktilerdi álemdik BAQ pen faktchekerler birneshe ret joqqa shyǵardy.
Rokfeller áýleti
Jalǵan mazmundy jasaýshylar mıllıarder Rokfeller áýletiniń esimderin jıi qoldanady. Tipti onymen attas adamdardy da ataıdy. Rokfeller jahandyq álemdik daǵdarysty bastaýshylardyń biri eken. Bul otbasynyń jahandyq úkimet ornatý boıynsha jasyryn josparlary bar, shańyraqty shaıqaltý úshin olar femınızmdi de oılap tapqan.
Bankır Devıd Rokfeller týraly da túrli qaýesetter tarady. Eń sońǵy jáne atyshýly málimdemelerdiń biri qazan aıynda tarady. Instagram-da bankırdiń daýysynyń aýdıojazbasy jarıalandy, onda ol óziniń otbasy men olardyń jaqtastary buqaralyq aqparat quraldary únsiz jatqanda, álemde óz tártibin ornatqanyn aıtady. Árıne, jazba jalǵan bolyp shyqty.
Ilon Mask
Tabysty amerıkalyq ınjener ári kásipker Ilon Masktyń tanymaldylyǵy kóp adamǵa maza bermeı otyr. Feık jasaýshylar mıllıarderge adamnyń erki men aqyl-oıyn baqylaý úshin mıǵa chıp salýǵa ruqsat berilgeni týraly aıtty. Masktyń mundaı ruqsaty bar ekeni ras bolyp shyqty. Biraq bul sal aýrýyna shaldyqqan adamdarǵa zamanaýı gadjetterdi basqarýǵa kómektesetin ımplantty engizýge arnalǵan.
Mask qarjylandyratyn Starlink spýtnıgin ushyrǵannan keıin Jelide feık kóp tarady. Habarlamalardyń birinde avtor ǵarysh kemesi týraly kompúterlik oıynnan alynǵan vıdeonyń úzindisin spýtnık dep usynǵan. Starlink joǵaryda bireýlerge júk jetkizedi dep aıtyldy. Tekserýden keıin Jelide taraǵan vıdeonyń spýtnıkke eshqandaı qatysy joq ekeni anyqtaldy.
Greta Týnberg
Shved eko-belsendisi Greta Týnberg 2018 jyly 15 jasynda pıketke jalǵyz shyǵyp, Jelide tanymal boldy. Ol kezde oqýshy bılikten klımattyń ózgerýine nazar aýdarýdy suraǵan bolatyn. Ýaqyt óte kele onyń esimi jańalyqtarda sırek aıtylatyn boldy, biraq feık aqparat shyǵarýshylar ony umytpaıdy. Olar 2023 jyly Gretanyń atynan birneshe jalǵan áńgime oılap tapty. Ol Qytaıdy aǵashtardy saqtaý úshin dástúrli taıaqshalardan bas tartýǵa shaqyrǵan eken.Týnberg mundaı málimdeme jasamaǵan. Taǵy bir feık jańalyq áskerı is-qımyldardarǵa qatysty boldy. Vıdeoda Gretanyń sózin dybystaǵan daýys soǵys kezinde «ekologıalyq» qarýdy, atap aıtqanda qaýipsiz tankterdi, vegandyq granatalardy jáne bıologıalyq ydyraıtyn zymyrandardy qoldanýǵa shaqyrǵan. Shyndyǵynda, bul áleýmettik jelilerde tez taraǵan ázil bolyp shyqty.
Taǵy bir ázilkesh Týnbergti bankır Rotshıldtiń shóberesi dep paıymdaǵan. Ár túrli elderdegi paıdalanýshylar bul habarlamany da qyzý talqylady. Biraq eko-belsendi men álemdegi baı jáne bedeldi otbasylardyń biriniń arasynda eshqandaı baılanys anyqtalǵan joq.
Sımpsondar
Eń tanymal múltfılmdegi sáýegeı otbasylardyń biri áli kúnge deıin kóptegen feıkterde aıtylyp júr. Bul oıdan shyǵarylǵan tulǵalar bolsa da, jalǵan jańalyqtarǵa laıyq. Jelidegi jarıalanymdardyń birinde Sımpsondardyń úkimetti áshkereleıdi delingen. Birneshe mýltserıaldan qurastyrylǵan (onyń ekeýi Sımpsondar týraly emes!) rolıkte bılik aýa raıymen manıpýlásıalar jasap, qoldan apattar týdyratyny aıtylǵan. Buǵan úles qosqan qupıa órkenıetter, adamdardy ýlaıtyn hımtreılder týraly da sóz qozǵalady. Munyń ótirik ekeni anyq. Kelesi bir jańalyqta Sımpsondar Silicon Valley Bank kúıreýin boljaıdy. Shyndyǵynda, múltfılmde banktiń ataýy adamdardy shatastyrý úshin ózgertilgen. Sondaı-aq olar Gavaııde órt bolatynyn jáne elektromagnıttik ımpúls saldarynan elektr qýaty óshetinin boljaǵan eken. Múltfılm keıipkerleriniń barlyq boljamdary feık bolyp shyqty.