Almatynyń búdjeti 2024 jyly áleýmettik salaǵa baǵyttalady
Memleket basshysynyń sapary kezinde baıandama jasaǵan Almaty ákimi Erbolat Dosaev 2024 jyly qala ekonomıkasynyń damý perspektıvalaryn atady, dep habarlaıdy almaty-akshamy.kz
Onyń aıtýynsha, 2023 jyldyń qorytyndysy boıynsha qala ekonomıkasy 7,5% deńgeıinde ósken. Joǵary baza aıasynda 2024 jyly Almatynyń jalpy óńirlik óniminiń (JÓÓ) ósýi 25,4 trln teńge kóleminde 5,5% deńgeıinde boljanady.
2024 jylǵa arnalǵan qala búdjeti 1,62 trln teńgeden astam mólsherde bekitildi. Onyń ishinde aǵymdaǵy shyǵystarǵa búdjettiń 68,4% baǵyttalady, bul 1,1 trln teńgeden asady. Qalanyń damý búdjeti 233 mlrd teńge boldy.
Almaty basshysy atap ótkendeı, qala búdjeti áleýmettik salaǵa baǵyttalýyn saqtaıdy jáne birinshi kezekte QR Prezıdenti Qasym-Jomart Toqaevtyń Almatynyń orta merzimdi damýynyń negizgi baǵyttary boıynsha tapsyrmalaryn iske asyrýǵa baǵyttalǵan. Áleýmettik ınfraqurylymdy damytý men jańǵyrtýǵa, bilim berý jáne densaýlyq saqtaý qyzmetiniń qoljetimdiligi men sapasyn arttyrýǵa basa nazar aýdarylady.