Jumyssyzdar úshin qysqa merzimdi úsh aılyq kýrstar uıymdastyrylǵan.
Bul týraly Óńirlik komýnıkasıalar qyzmetinde ótken brıfıńte Almaty qalalyq jumyspen qamtý jáne áleýmettik baǵdarlamalar basqarmasynyń orynbasary Danıar Álkebaıuly málimdedi, dep habarlaıdy Almaty-akshamy.kz
«Osy jyldyń 6 aıynda 12,5 mlrd teńge tólendi, halyqtyń áleýmettik qorǵalmaǵan toptaryna jatatyn 137 myń adamǵa kómek kórsetildi», - dedi spıker.
Bıyl halyqty jumyspen qamtý ortalyǵyna 21 400 qala turǵyny ótinish bildirdi, onyń 16 myńy jumysqa ornalastyryldy. Sondaı-aq, Danıar Álkebaıuly «Jastar tájirıbesi» baǵdarlamasynyń qalaı júzege asyrylyp jatqanyn habarlady. Almaty ákimi jas mamandardyń eńbekaqysyn 122 myń teńgege deıin arttyrýdy tapsyrǵanyn habarlady.
Basqarma ókili jumyssyzdar úshin suranysqa ıe mamandyqtar boıynsha qysqa merzimdi 3 aılyq kýrstar uıymdastyrylǵanyn da aıtty. Sonymen qatar, oqý barysynda olardyń barlyǵyna 21 myń teńge kóleminde shákirtaqy beriledi. Bıylǵy jyly 647 almatylyq kásiptik oqýǵa joldama aldy.