Qorǵanys mınıstrliginde áskerge shaqyrý naýqanynyń qorytyndysy shyǵaryldy.
Qorǵanys vedomstvosynda 2022 jyly azamattardy merzimdi áskerı qyzmetke shaqyrýdyń nátıjeleri qaralyp, bıylǵy jyldyń negizgi mindetterin aıqyndaýǵa arnalǵan keńes ótti, dep habarlaıdy Almaty-akshamy.kz.
Oǵan Bas áskerı prokýratýranyń, Qarýly Kúshterdiń, basqa da áskerler men áskerı quralymdardyń, jergilikti atqarýshy organdardyń ókilderi, sondaı-aq oblystar men respýblıkalyq mańyzy bar qalalardyń qorǵanys isteri jónindegi departamentteriniń bastyqtary qatysty.
Qarýly kúshter Bas shtabynyń bastyǵy, general-leıtenant Marat Qusaıynov jalpy áskerge shaqyrý mindetteri oryndalǵanyn jáne shaqyrý naýqany uıymdasqan túrde ótkenin alǵa tartty. 2022 jyly 35 myńǵa jýyq jas Qarýly Kúshter, Memlekettik kúzet qyzmeti, Shekara qyzmeti, Ulttyq ulan, Tótenshe jaǵdaılar mınıstrligi bólimsheleriniń qataryn tolyqtyrdy. Qazir olar áskerı istiń qyr-syryn úırenip, Otan aldynda boryshyn laıyqty atqaryp júr.
– Jyl saıyn Otan aldynda ózderiniń konstıtýsıalyq mindetterin oryndaıtyn myńdaǵan órender áskerge shaqyrý komısıalarynan ótedi. Al áskerı esepke alý prosesterin sıfrlandyrý, Qorǵanys mınıstrliginiń eGov.kz platformasy arqyly qyzmetter kórsetýi shaqyrý naýqany barysynda artyq búrokratıany, qaǵazbastylyqty qysqartýǵa jáne sybaılas jemqorlyq táýekelderin azaıtýǵa múmkindik berdi, – dedi general-leıtenant Marat Qusaıynov.
Ótken jyly Qarýly Kúshterdiń qoǵamdyq uıymdarmen, onyń ishinde jınaý pýnktteri men áskerı bólimderge barý múmkindigi bar ókildermen, sarbazdar analarynyń komıtetimen ózara is-qımyl jolǵa qoıylǵany atap ótildi. Bul sarbazdardyń týystary men jaqyndaryna, olardyń áskerge shaqyrylýynan bastap, áskerı ujymdarda ereje men tártiptiń bar ekendigine jeke kóz jetkizýge, sondaı-aq Qazaqstan áskeriniń ahýaly jaıly teris boljamdar men destrýktıvti qaýesetterdiń aldyn alýǵa múmkindik berdi.
Áskerge shaqyrýdy uıymdastyrýdyń ózekti máseleleri talqylandy. Jetildirýdi jáne birlesken júıeli jumysty qajet etetin aspektilerge erekshe nazar aýdarylmaq. Atap aıtqanda, bul áskerge shaqyrylýshylardyń densaýlyǵyn olardy sporttyq jáne áskerı-patrıottyq qyzmetke tartý arqyly mektep kezinen bastap nyǵaıtý.
Odan ózge keńes barysynda Qorǵanys mınıstrligi El Prezıdentiniń tapsyrmasyna sáıkes jastar arasynda áskerı boryshyn óteýge yntasyn arttyrý sharalaryn qabyldaǵanyn atap ótti. Osylaısha, Qorǵanys mınıstri 40-tan astam joǵary oqý oryndarynyń rektorlarymen kelisim jasasty. Olar 2023 jyldan bastap merzimdi áskerı qyzmet ótkergenderge UBT nátıjelerin esepke almaı, oqýǵa túsý quqyǵyn berýge ázir, al qyzmet barysynda erekshe kózge túskenderge oqý orny esebinen granttar berýge daıyn.