2022 jyldyń qańtar aıynan bastap birinshi synyp oqýshylaryna «Sıfrlyq saýattylyq» páni engiziledi, dep habarlaıdy almaty-akshamy.kz Bilim mınıstrligine silteme jasap.
Buǵan deıin oqýshylar úshinshi synyptan bastap «Aqparattyq-kommýnıkasıalyq tehnologıalar» pánin oqyǵan bolatyn.
«Oqý baǵdarlamasy suranys pen ýaqyt talaptaryna sáıkes bolýy tıis. Búgingi tańda sıfrlyq álemniń qarqyndy damyp jatqanyn kórip otyrmyz. Qazir smartfondar men kompúterlerdi mektepke deıingi kishi jastaǵy balalar paıdalanyp jatady. Sıfrlyq saýattylyq oqý men jazý sıaqty negizgi daǵdylardyń birine aınalyp keledi. Sondyqtan balalardy sıfrlyq saýattylyq jáne aqparattyq qaýipsizdik negizderine múmkindiginshe erterek úıretý mańyzdy. Álbette, jańa pándi oqytý barysynda balalardyń jas erekshelikteri de eskeriletin bolady», – dep atap ótti QR BǴM Mektepke deıingi jáne orta bilim komıtetiniń tóraǵasy Gúlmıra Kárimova.
Sonymen qatar 4-synypqa arnalǵan «Aqparattyq-kommýnıkasıalyq tehnologıalar» jáne 5-11 synyptarǵa arnalǵan «Informatıka» pánderi boıynsha oqý baǵdarlamalary qaıta qaraldy. Jańashyldyqtar balalardyń aqparattyq tehnologıalar salasynda sapaly bilim alýyna baǵyttalǵan.
Mektep baǵdarlamasy sheńberinde eń tanymal Python baǵdarlamalaý tili oqytylady. Sondaı-aq 5-9 synyp oqýshylary 3D-modeldeý men 3D-prıntıngke boıynsha bilim alady. 10-11 synyptardaǵy
«Informatıka» páni boıynsha úlgilik oqý baǵdarlamasy IT-salasynyń zamanaýı damý úrdisterin eskere otyryp ázirlengen. Oqytý baǵdarlamasynda IT-STARTUP, vırtýaldy jáne tolyqtyrylǵan shynaıylyq, jasandy ıntellekt, mobıldi qosymshalardy ázirleý, BigData jáne taǵy basqa taqyryptar bar.
Sondaı-aq barlyq synyptyń oqý baǵdarlamalaryna Internet jelisindegi qaýipsizdik erejeleri, avtorlyq quqyq týraly taqyryptar engizilgen.