“Almaty jastary” óńirlik baǵdarlamasy megapolıste 2017 jyldan bastap iske qosylǵan. Bıyl baǵdarlama aıasynda 1100 azamatqa nesıe berý josparlanýda.
Turǵyn úı satyp alý múmkindikteri men turǵyn úı qurylysy jınaq qarajaty júıesi týraly «Otbasy bank» AQ Almaty qalalyq fılıalynyń dırektory Danagúl Túsipova Óńirlik komýnıkasıalar qyzmetiniń alańynda tolyǵyraq aıtyp berdi, dep habarlaıdy Almaty-akshamy.kz.
Esterińizge sala keteıik, baǵdarlama 35 jasqa deıingi almatylyqtarǵa óz páterin satyp alý úshin jeńildikpen qaryz alýǵa múmkindik beredi. 18 mln teńgege deıingi mólsherdegi qaryz jyldyq 5% jeńildikpen beriledi.
"Bıyl barlyǵy 1100 jýyq jas almatylyqtardy qoljetimdi sharttar boıynsha nesıeleý josparlanýda. Úmitker tizimin qalalyq ákimdik qurdy, qazir olar tólem qabilettiligin rastap, páter tańdaý prosesinde. Bank qatysýshyǵa zaem alý týraly oń sheshim shyqqan kúnnen bastap baspana izdeýge 45 kúntizbelik kún ýaqyt beredi. Páterdi Almaty qalasyndaǵy alǵashqy nemese ekinshi naryqtardan, sondaı-aq «Qazaqstan turǵyn úı kompanıasy» AQ kepildigi bar nysandardan satyp alýǵa bolady”, - dep atap ótti D.Túsipova.
Almaty ákimdigi men “Otbasy bankiniń” birlesken jobasyna 35 jasqa deıingi/tolǵan almatylyqtar qatysa alady. Ótinishter Almaty qalasyndaǵy memlekettik respýblıkalyq jáne qalalyq uıymdarda jumys isteıtin azamattardyń kelesi sanattarynan qabyldanady:
- dárigerler men medbıkeler;
- muǵalimder men tárbıeshiler;
-ártister, jazýshylar, sýretshiler, kompozıtorlar, mádenıet salasynyń qyzmetkerleri;
- jattyqtyrýshylar men sportshylar;
- ýnıversıtetter men ǵylymı-zertteý ınstıtýttarynyń oqytýshylary men ǵylymı qyzmetkerleri;
- áleýmettik sala qyzmetkerleri men qalalyq komýnaldyq qyzmet mamandary;
- quqyq qorǵaý organdarynyń qyzmetkerleri (QR İİM, TJD, qalalyq prokýratýra, Sybaılas jemqorlyqqa qarsy qyzmet, Ekonomıkalyq tergeý departamenti)
- jýrnalıser men BAQ qyzmetkerleri (memlekettik jáne komersıalyq)
Úmitkerlerdiń resmı jumys ótili Almaty qalasynda sońǵy jarty jyldan kem bolmaýy tıis.
"Statısıkalyq málimetterge súıensek, búginde elimizdiń árbir úshinshi turǵyny jastar sanatyna jatady. Sondyqtan «Otbasy bank» oblys jáne qala ákimdikterimen birlese otyryp, arnaıy jas otbasylardy qoldaýǵa baǵyttalǵan baǵdarlamalardy qolǵa aldy. Qazirgi ýaqytta 2,6 mıllıon salymshy bolashaq baspanalaryna Otbasy bankinde qarajat jınap jatyr, klıenttiń ortasha jasy – 35 jas. Iaǵnı, qazaqstandyq jastar bizge senedi jáne qazir biz olarǵa óz ónimderimiz ben baǵdarlamalarymyzdy paıdalana otyryp, úıli bolamyn degen armandaryn júzege asyrýǵa kómektesip jatyrmyz", - dep bólisti ol.
Spıker atap ótkendeı, “Otbasy bankiniń” klıentteri depozıtter ashyp, odan ári baspana satyp alý úshin depozıt ashyp, sol jerde qarajat jınaǵandy jón kóredi. Osy jyldyń basynan 273 465 qazaqstandyq jańa jınaq shottaryn ashty.
Spıker “Otbasy bankimen” iske asyrylatyn turǵyn úı qurylysy jınaq qarajaty júıesi odan ári nesıeleý úshin depozıtte qarajat jınaýǵa múmkindik beretinin eske saldy.
"Onyń klasıkalyq ıpotekamen salystyrǵandaǵy biregeıligi men artyqshylyǵy – bul qazaqstandyqtarǵa jyldyq 3,5%-dan 5%-ǵa deıingi mólsherleme boıynsha (JTSM 3,6%-dan bastalady) kredıtke turǵyn úı satyp alýǵa múmkindik beredi. Mundaı mólsherlemeni birde-bir ekinshi deńgeıli bankter usynbaıdy. Osylaısha, turǵyn úı qurylysy jınaq aqshasy júıesi ıpotekalyq tólemderdi kóterimdi etedi, al artyq tólemdi barynsha boldyrmaıdy", – dedi ol.
Turǵyn úı qaryzy - bul banktegi jınaq aqsha shotynda qarajat jınaýdy jáne turǵyn úı qurylysy jınaq aqshasy týraly sharttyń kelesideı úsh talabyn oryndaýdy kózdeıdi:
- kem degende úsh jyl jınaqtaý;
- sharttyq somanyń keminde 50%-yn jınaqtaý;
- baǵalaý kórsetkishiniń eń tómengi mólsherine (16) qol jetkizý.
Depozıtte qarajat jınaqtalyp jatqanda, bank olarǵa jyl saıyn jyldyq 2% mólsherinde syıaqy esepteıdi jáne 200 AEK-ten, ıaǵnı 690 000 teńgeden aspaıtyn somaǵa 20% mólsherinde memleket syılyqaqysy esepteledi. Eger bul soma bir jylda jınalsa, onda 2023 jyly eń kóp syılyqaqy somasy 138 000 teńgeni quraıdy.
Osylaısha, shotta turǵyn úı qunynyń 50%-y jınaqtalsa, jetispeıtin 50%-yn bank jyldyq 3,5%-dan 5%-ǵa deıingi mólsherleme boıynsha (JTSM 3,6%-dan bastalady) kredıtke beredi.
Bank qarajatty tıimdi jınaqtaý úshin otbasylyq paketti paıdalanýdy usynady. Bul jaǵdaıda ár otbasy múshesine depozıtter ashylady, sonda ár salymǵa memlekettik syılyqaqy jeke-jeke túsip otyrady. Nesıe alýǵa ótinish bildiretin otbasy múshesine nesıe ótinimin bermesten buryn depozıtterdi taǵaıyndaýǵa jáne biriktirýge bolady.
Sonymen qatar, “Otbasy Bankiniń” áskerı qyzmetshilerge arnalǵan “Jańa baspana”, “Óz úıim” baǵdarlamasy, “Umaı” áıelder ıpotekasy, “Jasyl ıpoteka”, “Korporatıvtik ónim” sıaqty jeke baǵdarlamalary bar.
Búgingi tańda el boıynsha salymshylar sany 2,6 mln asty. Bıyl jartyjyldyqta Otbasy bank 28 800 zaem berdi.