Olar Qarýly Kúshter men Ulttyq ulan, Shekara qyzmeti jáne Tótenshe jaǵdaılar mınıstrliginiń bólimderine qabyldanady.
Áskerge barǵan jastar úshin joǵary oqý ornynda tegin bilim alýǵa múmkindik bar. Elimizdiń barlyq óńirlerinde 18 ben 27 jas aralyǵyndaǵy azamattardy merzimdi áskerı qyzmetke shaqyrý bastaldy. Josparǵa sáıkes kóktemgi naýqan aıasynda 20 000 bozbala áskerı bólimderge jóneltiledi, dep habarlaıdy Almaty-akshamy.kz 24.kz-ke silteme jasap.
Qazirgi tańda el boıynsha 195 aýmaqtyq komısıa áskerı qyzmetke shaqyrýdy júzege asyryp jatyr.
«20 myńǵa jýyq bizdiń jas sarbazymyz sapqa turǵyzylatyn bolady. Onyń ishinde Qarýly Kúshterge 9 myńǵa jaqyn, Shekara qyzmetine 6 myńǵa jýyq, Ulttyq ulan áskerı bólimderine 9 myńǵa bizdiń sarbazdarymyz sapqa turǵyzylatyn bolady», - deıdi QR QK Bas shtaby Uıymdastyrý-jumyldyrý departamenti bastyǵynyń orynbasary Rýslan Omarov.
Sarbazdarǵa áskerı qyzmetin ótkerý kezeńinde kredıttik demalys beriledi. Shaqyrý naýqany barysynda jınalǵan banktik qaryzdar men mıkrokredıtter týraly málimetter birden Qarjy naryǵyn retteý jáne damytý agenttigine jiberiledi. Osy derekterdiń negizinde kredıtorlar negizgi borysh, syıaqy boıynsha tólemderdi keıinge qaldyrady.
Áskerı qyzmettiń tartymdylyǵyn arttyrý maqsatynda áskerı qyzmet ótkergenderge joǵary oqý oryndaryna túsýge jeńildikter beriledi. Ol úshin 45 jetekshi joǵary oqý ornynyń rektorlarymen memorandýmǵa qol qoıyldy.
«Merzimdi áskerı qyzmet ótkergen bizdiń azamattarymyz UBT-ǵa kirmeı-aq, JOO-ǵa túsý múmkindigi berilgen. Byltyr áskerı qyzmetin ótegen azamattarymyzdyń 700-ge jaqyny qazirgi tańda JOO-da oqyp jatyr. Qarjy retteý agenttigimen jasalǵan memorandýmnyń arqasynda bizdiń merzimdi áskerı qyzmetker shaqyrylǵan azamattarymyzǵa kredıttik demalystar berilip otyr», - deıdi QR QK Bas shtaby Uıymdastyrý-jumyldyrý departamenti bastyǵynyń orynbasary Rýslan Omarov.
Áskerı bólimderge jóneltilgen sarbazdardyń aldy búginde áskerı ant qabyldap, Otan qorǵaýshylardyń qataryna qosyldy.
«Kelgenimizge búgin 28 kún boldy. Eń birinshi bolyp biz keldik. Eldiń, úıdiń, Otannyń qadirin túsindik jáne de tártip, «tártipke baǵynǵan qul bolmaıdy» degendi túsindik. İshte báriniń jaǵdaıy birdeı, kóńilim tolady», - deıdi qatardaǵy jaýynger Dáýlet Bolatbaıuly.
Kóktemgi áskerge shaqyrý naýqany maýsym aıyna deıin jalǵasady. Aıta ketelik, áskerge shaqyrylǵandardyń tiziminde zapastaǵy ofıserler de bar. Olar jetispeıten mamandar qataryn tolyqtyratyn bolady.