Shardara sý qoımasynda zańsyz balyq aýlaýshylarǵa tosqaýyl bolmaı tur.
Túrkistan oblysyndaǵy Shardara sý qoımasynda zańsyz balyq aýlaýshylarǵa tosqaýyl bolmaı tur. Qazir balyqtardyń ýyldyryq shashatyn kezi ekenine qaramastan, brakonerler bul talaptarǵa baǵynbaı keledi, dep habarlaıdy Almaty-akshamy.kz QazAqparatqa silteme jasap.
Sala mamandary 20 mamyrǵa deıin balyq aýlaýǵa tyıym salynǵanyn aıtady. Alaıda reıd kezinde jergilikti turǵyndardyń, ásirese, túngi ýaqytta aý salatyny anyqtalǵan. Nátıjesinde zań buzýshylarǵa qatysty 65 ákimshilik hattama toltyrylyp, 7 qylmystyq is qozǵaldy. Kelgen shyǵyn kólemi - 4,5 mln teńge.
Inspektorlardyń aıtýynsha, halyq zańdy durys bilmegendikten, jıi zańbuzýshylyqqa barady.
Sondaı-aq, sý qoryqshylarynyń brakonerlermen tamyr-tanys bolýy da sebep bolyp jatady.
«Sý qoryqshylary da, zańsyz balyq aýlaýshylar da - osy aýmaqtyń, jaqyn aýdandardyń azamattary. Tanys bolǵan soń, sybaılastyqqa, aǵaıyn-týystyqqa jol berilip jatady. Qazir qarmaqpen balyq aýlaǵan jaǵdaıda, QR ÁQBtK 383-babyna sáıkes, jaýapkershilikke tartylyp, 10 aılyq eseptik kórsetkishten 20 aılyq eseptik kórsetkishke deıin aıyppul salynady. Al, toqpen nemese shanyshqymen aýlaǵan jaǵdaıda qylmystyq jaýapkershilikke tartylatyn bolady», - deıdi Aral-Syrdarıa balyq sharýashylyǵy baseıni Túrkistan oblysy boıynsha ınspeksıasy bólimi basshysynyń orynbasary Meıirjan Ómiralıev.