Almatynyń Alataý aýdanyndaǵy 20 kóshede 1,1 myńnan astam sham jáne 8 km kabel aýystyryldy, dep habarlaıdy almaty-akshamy.kz
2024 jyly Almatynyń Alataý aýdanyndaǵy 284 kóshede syrtqy jaryqtandyrý jelileri qaıta jańartylyp jatyr. 2023 jyly «AJQ» AQ ınvestısıalyq baǵdarlamasy aıasynda 230 km elektrmen jabdyqtaý jelileri men 93 transformatorlyq qosalqy stansıalarǵa jóndeý júrgizildi. 2024 jyly 275 km elektrmen jabdyqtaý jelileri men 73 qosalqy stansıa jóndeledi. Bul týraly Almaty ákimi Erbolat Dosaev Alataý aýdanynyń turǵyndarymen eseptik kezdesý barysynda habarlady.
Qala basshysy atap ótkendeı, Rahat-Mádenıet shaǵyn aýdanyndaǵy elektr jaryǵynyń jıi óshýi máselesi sheshiledi, munda daıyndalǵan jobaǵa sáıkes jańa elektr júıesine 2 myńnan astam úı qosylady. Jańa elektr jelilerin salý osy jyldyń maýsymynda bastalyp, 2025 jyldyń mamyr aıynda aıaqtalady.
«Sapaly syrtqy jaryqtandyrý aýdanymyzdaǵy ózekti máselelerdiń biri bolyp otyr», - dedi Erbolat Dosaev esepti kezdesýge qatysýshylarǵa arnaǵan sózinde.
2023 jyly 20 kósheniń 1135 jaryq shamdary men 8 km kabel aýystyryldy (shamdardyń jalpy sany - 16 423). «Kóshelerdi shammen tolyq jaryqtandyrý úshin aýdan ákimdigi 284 kóshede syrtqy jaryqtandyrý jelilerin salý jáne rekonstrýksıalaý boıynsha jobalyq-smetalyq qujattardy daıyndaý bastaldy. Qurylys-montajdaý jumystary osy jyldyń sońynda aıaqtalady», - dep sózin túıindedi Erbolat Dosaev.