Táýelsizdik kúni ómirge kelgen sábıler
Qazaqstanda 16-17 jeltoqsan – Táýelsizdik merekesi kúnderi dúnıege kelgen 2 myńnan astam sábıge baby-bokstar syıǵa tartyldy. Bul týraly QR Sıfrlyq damý, ınovasıalar jáne aeroǵarysh mınıstrliginiń baspasóz qyzmetinen málim etti, dep habarlaıdy Almaty-akshamy.kz.
Buǵan deıin jazǵanymyzdaı, Táýelsizdiktiń 30 jyldyq mereıtoıyna oraı berilgen «Súıinshi» syıqorabyna bóbekterge qajetti zattardan basqa, QR Prezıdenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy jáne balanyń týýy týraly kýáligi salynǵan.
«Aınalaıyn, bóbek! Seniń týǵan kúniń elimizdiń eń basty merekesimen tuspa-tus keldi. Óziń dúnıe esigin ashqan kezde halqymyz qasterli Táýelsizdiginiń 30 jyldyǵyn atap ótip jatty. Saǵan baqytty ári uzaq ǵumyr tileımin!», - dep jazylǵan Prezıdenttiń quttyqtaýynda.
16 jáne 17 jeltoqsanda týǵan balalarǵa týý týraly kýálikti alý týraly ótinimderdi «Azamattarǵa arnalǵan úkimet» memlekettik korporasıasynyń qyzmetkerleri qabyldap, ári qaraı Qazaqstan azamatynyń alǵashqy qujatyn resimdeý úshin AHAJ organdaryna joldady.
«Súıinshi» syıqoraptaryn QR Sıfrlyq damý, ınovasıalar jáne aeroǵarysh mınıstrligi «Azamattarǵa arnalǵan úkimetpen birge jáne QR Ulttyq bank, Sentrkredıt banki jáne «Qazposhta» AQ qatysýymen uıymdastyrdy.