Qazaqstanda OKQ alańynda Otbasy kúnin atap ótýdiń jańa konsepsıasyn tanystyrýǵa arnalǵan brıfıńi ótti. İs-sharaǵa Mádenıet jáne aqparat mınıstrligi, İshki ister mınıstrligi, Eńbek jáne áleýmettik qorǵaý mınıstrligi, Oqý-aǵartý mınıstrligi ókilderi, sondaı-aq otbasylyq qarym-qatynas salasyndaǵy sarapshylar qatysty, dep habarlaıdy aqshamnews.kz.
Kezdesýde Memleket basshysynyń otbasy saıasaty salasyndaǵy Joldaýyn júzege asyrý sharalary, sondaı-aq Ulttyq quryltaı otyrysynda Qasym-Jomart Toqaevtyń qoǵamda otbasy qundylyqtaryn nasıhattaýǵa arnalǵan tapsyrmalarynyń oryndalýy talqylandy.
Otbasy kúnin atap ótýdiń jańa konsepsıasy osy mindetterdi sheshýge baǵyttalǵan. 2-8 qyrkúıek aralyǵynda Otbasy kúnine arnalǵan aptalyq ótedi. Ár kún arnaıy taqyrypqa arnalady. Onyń ishinde otbasylyq dástúrler, neke josparlaý, reprodýktıvti densaýlyq, sanaly ata-ana bolý, otbasylyq demalys jáne basqa da taqyryptar bar. Mádenıet jáne aqparat vıse-mınıstri Evgenıı Kochetov mundaı formattyń merekeni keń aýqymda ótkizýge jáne onyń tıimdiligin arttyrýǵa múmkindik beretinin atap ótti.
«Búgingi tańda otbasy men nekeniń jaǵymdy ımıjin qalyptastyrý, otbasy qundylyqtaryn nasıhattaý, ata-analardyń balalardy tárbıeleýdegi jaýapkershiligin arttyrý, balalarynyń qart ata-analaryna qamqorlyq jasaýy – ulttyq mańyzy bar mindetter», - dedi Evgenıı Kochetov.
Brıfıńte otbasy saıasatynyń negizgi baǵyttary, memlekettik qoldaý sharalary, sondaı-aq «Qazaqstandyq otbasylar» ulttyq baıandamasynda usynylǵan áleýmettik zertteýlerdiń qorytyndylary týraly da aıtyldy.
Saýalnama nátıjeleri boıynsha respondentterdiń 62,7%-y otbasynda qamqorlyq, ózara qurmet kórsetý jáne qoldaý mańyzdy dep sanaıdy. Odan keıin orynda – mahabbat (43,2%) jáne balalar (38,7%) máselesi. Sondaı-aq zertteý barysynda eńbekqorlyq, adaldyq jáne úlkenderge qurmet kórsetý – elimizdegi óskeleń urpaqqa úıretiletin basty qundylyqtar ekendigi anyqtaldy.