2025 jyldyń 20 naýryzynda Almaty qalasy Alataý aýdanynyń №164 bóbekjaı balabaqshasynda qazaqtyń jańa jyly – Naýryz meıramyna arnalǵan «Armysyń, áz Naýryz!» merekelik is-sharasy ótti, dep habarlaıdy aqshamnews.kz.
Bul sharanyń basty maqsaty – balalarǵa ulttyq dástúrlerdi nasıhattaý, ata-babamyzdan qalǵan asyl murany dáripteý, sondaı-aq otbasy qundylyqtaryn nyǵaıtý boldy.
Mereke aıasynda «Sheber áke – ónerli bala» ulttyq baıqaýy jáne dástúrli qolónerdi nasıhattaýǵa arnalǵan «Tekemet basý» sheberlik saǵaty uıymdastyryldy. Baıqaý «Birtutas tárbıe» baǵdarlamasy aıasynda ótip, balalardyń shyǵarmashylyq qabiletterin damytýǵa, olardyń batyldyǵy men tapqyrlyǵyn arttyrýǵa, sondaı-aq ata-analarmen baılanysty nyǵaıtýǵa baǵyttaldy.
«Sheber áke – ónerli bala» ulttyq baıqaýy
Baıqaýǵa ákeler men uldar qatysyp, óz ónerleri men sheberlikterin bes kezeń boıynsha kórsetti:
1. «Men qazaqtyń ulymyn, tegimdi meniń surasań» – qatysýshylardyń ózin-ózi tanystyrýy.
2. «Segiz qyrly, bir syrly» – shyǵarmashylyq qabiletterin kórsetý: dombyrada kúı oryndaý, án aıtý, bı bıleý, kórkemsóz oqý.
3. «Bilgenge marjan» – qazaq halqynyń ulttyq dástúrleri, maqal-mátelderi men ulttyq oıyndaryna baılanysty suraqtarǵa jaýap berý.
4. «Kúsh atasyn tanymas» – kúsh pen eptilikke arnalǵan kezeń: ákeler bildesý (qol kúresi) saıysyna qatysyp, balalar qoı kóterý jarysynda baq synady.
5. «Sheberdiń qoly ortaq» – sheberlikke arnalǵan kezeń: qatysýshylar úsh mınýt ishinde qazaqtyń dástúrli qamshysyn órý tapsyrmasyn oryndady.
«Tekemet basý» ulttyq qolóner sheberlik saǵaty
Kópshiliktiń erekshe qyzyǵýshylyǵyn týdyrǵan taǵy bir shara – tekemet basý boıynsha sheberlik saǵaty boldy. Analar men ájeler balalarǵa kıiz basý ónerin úıretip, dástúrli qolónerdiń qyr-syryn kórsetti.
Ulttyq mura – zamanaýı tárbıeniń negizi
Mereke arnaıy bezendirilgen alańda ótti. Balabaqsha aýlasynda ulttyq naqyshta bezendirilgen kıiz úıler tigildi, bul qazaq aýyldarynyń erekshe atmosferasyn sezinýge múmkindik berdi. Balalar ulttyq ónermen tanysyp qana qoımaı, ony tájirıbe júzinde de úırendi.
Merekege balabaqshanyń 278 tárbıelenýshisi men olardyń ata-analary qatysty. İs-shara sońynda barlyq qatysýshylarǵa alǵys hattar men estelik syılyqtar tabystaldy. Ata-analar balabaqsha ujymyna osyndaı maǵynaly shara uıymdastyrǵany úshin rızashylyqtaryn bildirdi.
KGKP «Iaslı-sad №164» balabaqshasy ulttyq qundylyqtarǵa negizdelgen tárbıeni jalǵastyryp, balalarǵa halqymyzdyń tarıhy men mádenıetin qurmetteýdi úıretýde.