Mamyr aıynda jumys berýshiler EEB-da 95 myńǵa jýyq bos jumys ornyn ornalastyrdy
2023 jylǵy mamyrda Elektrondyq eńbek bırjasynda 94,9 myń bos jumys orny jáne 74,5 myń túıindeme ornalastyryldy. Sáýirmen salystyrǵanda bos oryndar sany 10,5% – ǵa (+9 myń), al túıindeme 0,9% - ǵa (+628) ósken, dep habarlaıdy almaty-akshamy.kz
Esepti aıda EEB-da eńbek resýrstarynyń jetispeýshiligi 20,4 myń birlikti nemese ornalastyrylǵan bos laýazymdardyń jalpy sanynyń 22%-yn qurady. Bul rette óńirlerdiń geografıalyq ornalasýy turǵysynan kadrlardyń profısıti aldyńǵy aıdaǵydaı ońtústik oblystarda, atap aıtqanda Shymkent qalasyna (túıindeme sany bos oryndar sanynan 2,4 myńǵa nemese 78% - ǵa asyp ketken) jáne Túrkistan oblysyna (5,1 myńǵa nemese 76% - ǵa) baıqaldy.
Mamyr aıynda bos oryndar sany men túıindeme aıyrmashylyǵynyń jalpy respýblıkalyq kórsetkishine Qaraǵandy oblysy (bos oryndar túıindemeden 5,6 myń birlikke asyp, jumysqa ornalasýǵa qoljetimdi oryndardyń jalpy sanynyń 65%-dy qurady) jáne Ulytaý oblysy (bos oryndar túıindemeden 646 birlikke asyp tústi, bul óńirdegi jalpy qajettiliktiń 46% - na sáıkes keledi) barynsha áser etti.
Eńbek naryǵynda eń suranysqa ıe jáne tapshy kadrlar avtomobıl júrgizýshileri (1,9 myń bos jumys orny jáne 1,5 myń túıindeme), kúzetshiler (1,6 myń bos jumys orny jáne 889 túıindeme) jáne tárbıeshiler (1,5 myń bos jumys orny jáne 810 túıindeme) bolyp qala beredi. Sáýir aıymen salystyrǵanda medısına qyzmetkerlerine (1,6 myń bos jumys orny jáne 1 myń túıindeme) jáne baılanys ortalyǵynyń operatorlaryna (1,9 myń bos jumys orny jáne 11 túıindeme) suranystyń artýy baıqalady.
Jumys izdeýshilerdiń arasyndaǵy eń belsendi top dástúrli túrde 16-35 jas aralyǵyndaǵy jastar bolyp qala beredi.
Mamyr aıynda jumys berýshiler AKT jobalarynyń menedjerlerine (1,2 mln teńgeden bastap) jáne jańa ónimderdi ázirleý jónindegi joba jetekshilerine (1 mln teńgeden bastap) – ıaǵnı biliktilik talaptary men quzyretteriniń uqsas jıyntyǵy bar bos laýazymdar úshin eń joǵary jalaqyny usynýǵa daıyn boldy. Aıta ketý kerek, EEB-da úmitkerlerdiń 5,3% - y qajetti jalaqy mólsherin kórsetpeýdi jón kóredi.
Jalpy mamyr aıynda sáýirmen salystyrǵanda eńbek naryǵy egis naýqanynyń aıaqtalýyna baılanysty aýyl sharýashylyǵy salasynyń mamandaryna suranystyń tómendeýimen sıpattalady. Baılanys ortalyǵynyń operatorlary arasynda kadrlyq resýrstardyń jetispeýshiligi jumys izdeýshilerdiń jumysqa ornalasýǵa arnalǵan basqa onlaın-platformalarǵa aýysýymen de, COVID-19 pandemıasy kezeńinen beri baıqalǵan qashyqtaǵy kásip qyzmetkerlerine suranystyń artýynyń Dúnıejúzilik trendimen de baılanysty bolýy múmkin.