Jyl basynan beri İshki ister mınıstrligi izdeýde júrgen 58 qylmyskerdi ustady, dep habarlady Polisia.kz.
Keıbir qylmyskerdiń qalaı ustalǵanyn İİM Krımınaldyq polısıa departamenti basshysynyń orynbasary Rýslan Nazarov aıtyp berdi.
«Aqtaý polısıasy jergilikti turǵyndy ustady. Byltyr qarashada ol mas kúıinde qaladaǵy kafelerdiń birinde janjal shyǵaryp, turǵyndy uryp-soqqan. Jábirlenýshi aýyr halde aýrýhanaǵa jatqyzyldy.
Ózbekstannyń Úshqorǵan qalasynda jergilikti quqyq qorǵaý organdary Almaty oblysynyń krımınaldyq polısıa qyzmetkerlerimen birlesip, izdeýde júrgen ózbekstandyqty ustady. Ol 2 adamdy óltirdi degen kúdikke ilingen. 2012 jyly er adam Almaty oblysy Eńbekshiqazaq aýdanynda jumys istep júrip, zeınetkerlerdiń úıine zańsyz kirgen. Osylaısha, olardy óltirip, aqsha urlap ketken.
Astanada polısıa qostanaılyq áriptesterimen birlesip, 2020 jyly «Elordada salynatyn turǵyn úı keshenine ınvestısıa salamyz jáne brondaımyz» degen syltaýmen 144 úleskerdiń aqshasyn ıemdengen kompanıa dırektory men quryltaıshysyn ustady. Olar taǵy 2 JSHS basshysymen birge 4 mlrd teńgeni jymqyrǵan. Sońǵy ekeýi buryn ustalǵan. Qazir olardyń ústinen tergeý júrip jatyr, - dedi ol.
Sondaı-aq krımınaldyq polısıa habar-osharsyz ketken 30 adamnyń qaıda júrgenin anyqtady.