Platforma halyqtyń bilim deńgeıi men kásibıligin arttyrýǵa yqpal etedi.
Qazaqstan Úkimeti onlaın kásiptik oqytý platformasy iske qosylǵaly beri qansha qazaqstandyq bilim alǵanyn jetkizdi, dep habarlaıdy Almaty-akshamy.kz.
"Byltyr shilde aıynda skills.enbek.kz onlaın kásiptik oqytý platformasy iske qosylǵan sátten bastap 142 myń azamat, onyń ishinde 25 myńǵa jýyq jumyssyz adam kýrstan ótkeni týraly sertıfıkat aldy. Platformada jalpy 179,1 myń qazaqstandyq tirkeldi, onyń 165,7 myńy 2022 jyly tirkelgen", - delingen Eńbekmıni baspasóz qyzmetiniń habarlamasynda.
Oqýdan ótken 25 myń jumyssyz azamattyń 7,6 myńy – negizinen Aqtóbe, Almaty, Qyzylorda, Túrkistan oblystary men Almaty qalasynyń jastary.
Platforma iske qosylǵan sátten bastap avtorlar onda ártúrli baǵyt boıynsha 162 kýrs jarıalady, onyń 106-i tegin. Kýrstardyń uzaqtyǵy - 1-den 72 saǵatqa deıin.
Eń tanymal kýrstar – «Sútti iri qara ósirý», «Ýpravlenıe personalom», «Vyrashıvanıe klýbnıkı ot A do Ia», «Kasır» jáne «Unnan jasalǵan kondıter ónimderi, jiktelýi jáne daıyndalý tehnologıasy».
Budan buryn habarlaǵandaı, Platforma halyqtyń bilim deńgeıi men kásibıligin arttyrýǵa, mansaptyq damýdy yntalandyrýǵa jáne «ómir boıy oqytý» tujyrymdamasyn ilgeriletýge baǵyttalǵan. Ol marketpleıs – qyzmetter naryǵy qaǵıdaty boıynsha onlaın kýrstarǵa qol jetkizýdi usynatyn halyqaralyq oqytý alańdaryna uqsas qurylǵan.
Oqýǵa tikeleı https://skills.enbek.kz/ siltemesi arqyly nemese Elektrondyq eńbek bırjasynda (enbek.kz) «Onlaın oqytý» bólimin tańdaý arqyly ótýge bolady.
Platformada bilim alýshy oqytýdyń qolaıly qarqyny men tildi, materıaldy berýdiń yńǵaıly qaǵıdatyn óz betinshe tańdaıdy, bilim berý prosesindegi óziniń progresin baqylaı alady.
Oqý aıaqtalǵannan keıin bilim alýshy 70% shekti deńgeımen testileý tapsyrýy tıis. Onlaın kýrsty sátti aıaqtaǵan jaǵdaıda daǵdylardy ıgerý týraly sertıfıkat beriledi. Kýrsty aıaqtaýdyń mindetti sharty – stýdent tarapynan kýrsty baǵalaý.
Bul sertıfıkat Elektrondyq eńbek bırjasynda (enbek.kz) tirkelgen kezde bilim alýshy jasaǵan túıindemede avtomatty túrde kórsetiledi. Qyzmetkerlerdi izdeý kezinde áleýetti jumys berýshi skills.enbek.kz-te tabysty oqýdan keıin alynǵan sertıfıkattardy kóre alady.
2022 jylǵy naýryzdan bastap platformada qoldanystaǵy fýnksıonal ońtaılandyrylyp, jańa servıster iske qosylǵanyn esterińizge sala keteıik.
Atap aıtqanda, kýrstardy izdeý jetildirildi, sabaqtardyń túsinikti qurylymy jasaldy, oqý prosesin baqylaý jáne kýrs avtorlarymen jyldam ózara árekettesý múmkindigi paıda boldy.
Kýrs avtorlary úshin yńǵaıly sabaq qurastyrýshy qoljetimdi, jarıalanǵan kýrstardyń statısıkasy men tıimdiligin qaraý, sertıfıkattardyń ártúrli dızaıny qarastyrylǵan, sonymen qatar oqý qunyn aldyn-ala esepteýge arnalǵan onlaın-kalkýlátor bar.
Avtorlar men ázirleýshilerge arnalǵan platformada onlaın kýrstardy ornalastyrý tegin. Kýrstar memlekettik jáne orys tilderinde ornalastyrylýy múmkin, aqparat berýdiń ártúrli formattary: mátin, prezentasıa, beıne jáne aýdıo materıaldar, ınfografıka jáne basqa túrleri bolýǵa tıis. Usynylatyn onlaın kýrstardyń uzaqtyǵy 6-dan 144 saǵatqa deıin. Platformanyń erekshe qajettilikteri bar stýdentter úshin ınterfeısti beıimdeý múmkindigi bar.
skills.enbek.kz-te tirkelý jáne platformada jumys isteýge qatysty barlyq suraq boıynsha «ERDO» AQ jaýapty qyzmetkerlerimen baılanysýdy suraımyz: 8 (7172) 95 43 17 (ishki. 877, 878).