Túrkistan oblysynda turatyn 14 jasar jetkinshek áýeletip dop tebýden álem rekordyn jańartýy múmkin.
Qazyǵurttyq Meırambek Sileýsinov dopty jerge túsirmeı, 7994 ret tepti, dep habarlaıdy aqshamnews.kz 24.kz-ke silteme jasap.
Sport sarapshylary bul álemdegi eń joǵary kórsetkish dep otyr.
Áýelete dop tebýden Ordabasy fýtbol akademıasy uıymdastyrǵan saıysta Meırambek óziniń ǵana emes, álemdegi aıaq dop sheberleriniń rekordyn jańartty. Buǵan deıin áýelete dop tebýden eń úzdik kórsetkish brzılıalyq áıgili fýtbolshy Ronaldınoǵa tıesili bolǵan. Ol dopty jergi túsirmeı 7432 ret tepken. Al Meırambektiń kórsetkishi 7994.
Meırambek Toılybaev, oqýshy:
- Men jarysqa 1 aptadaı daıyndaldym. Azanda sabaqqa ketemin túste kelem. Kúnde 2-3 myń uryp turamyn. Jarysqa baryp qorqynysh eshqandaı sezim bolǵan joq. 8 myńdy isteımin dedim, keıin bas júldeni aldym.
Meırambektiń ala dopty serik etkenine 3 jyldan asty. Ony sporttyń bul túrine aǵasy Bekarys baýlyǵan. Ol inisiniń erekshe qabiletke ıe ekenin baıqap kún saıyn bos ýaqytynda top tebýdi úıretken.
Bekarys Toılybaev, Meırambektiń aǵasy:
Meırambek ózi jastaıynan dopqa qumar bolyp oınap ósti. Birte-birte qyzyǵýshylyǵyn baıqadym. Baıqaǵannan keıin ármen qaraı qyzyǵýshylyǵyn oıatý maqsatynda professıonalnyı doptar alyp daıyndyǵyn kúsheıte bastadyq.
Meırambektiń rekordy ázirge qujat júzinde bekitilmegen. Biraq onyń 3 saǵatqa jýyq dopty túsirmeı tepkenin dáleldeıtin vıdeolary bar. Eger rekordtar kitabyna engizý úshin qaıta dop teptirse oǵan da daıyn. Al oqýshynyń osy kórsetkishine qarap ony úlken fýtbol klýbtary shaqyrta bastaǵan.
Arman Pirmanov, Ordabasy fýtbol akademıasynyń ókili:
Bizdiń oıymyz qazir bul balany aýdannan alyp kelý kerek. Aǵasyna da aıttyq. Endi aǵasy jaqynda qalaǵa kóship kelip osy jaqqa inisin alyp keledi Shymkentke. Sodan keıin biz akademıaǵa alyp baramyz. Ol jerden jaqsy oınap ketip jatsa ózimizdiń Ordabasyǵa alyp ketemiz. Ary qaraı jatatyn jerin de, tamaǵyn da barlyǵyn Ordabasy, Ońtústik akademıa tóleıdi.
8-synypta oqıtyn Meırambek bolashaqta Qazaqstan Ulttyq quramasy sapynda oınaýdy armandaıdy. Sonymen qatar áýelete dop tebýden óz rekordyn 10 myńǵa jetkizip, álemde birinshi bolýdy qalaıdy.